Shillong, Feb 22: North Garo Hills district-ni ning·ogipa Rajasimla songoni Omed Memorial Secondary School-ni gital nokko, Kharkutta-ni MLA Pa Rupert Momin-ni dongpaanio a·dokni skotong minister Pa Conrad K. Sangma, da·al Sombar salo nokdonggae on·angaha.
A·chik jatni gisepo Christian toromko ra·chenggipa Pa Omed W Momin sagiko dingtangmancha mande ra·ani gita, songni-nokni manderang Rajasimla song jatchio donggipa Rongdal-Rongkil chibima sambao Omed Memorial Secondary School-ko 1969 bilsini February 17 tariko a·bachengate on·angaha. Indake, uko 1971 bilsio kuliaha, 1974 bilsio Adhoc grant-ko man·ani ja·man 1983 bilsi jolo deficit system-ni ning·o ua skulko chalaiaha. Skulko chu·gimik jako ra·e nirokatenggiparangni aganani gitade, re·baenggipa bilsio ua skulko Higher Secondary-ni gadangona ra·doatgen.
A·doko skia-porani gadangrangko tang·doatna skulrangko chalaianio mongsong nangchongmotgiparangko chu·sokate on·na cholrangko man·e Meghalaya a·dokna “Supporting Human Capital Development Project”-ko a·bachengate on·anina Asian Development Bank aro a·dokni Education Department-ko skotong minister salni tom·anio dingtangmancha mittelpilangaha.
Ku·mongrime kamrangko ka·anichisa sorkari, skia-porani a·bako changsatai a·doko srongatpilna gita cholko man·gen aro poraienggipa chatro-chatrirangna skie ra·ani aro skie on·ani cholrangko nambatatna man·gen ine an·tangni ka·dongsoaniko skotong minister parakangaha.
“Skia-porani a·bao gimikko man·gopatna nanga aro poraigipa chatro-chatrirangni poraianiko gisik nangbatatna aro uamangko mikkangchi chu·sokgniona dilna gita songsal aro sorkari dolgni nangrime kamko ka·na nanggen,” ine Pa Sangma aganaha.
Ua skulo poraigiparang, percentage komiesan pass ka·engani gimin an·tangni suk ong·gijaniko parakengon, bi·sarangko skie ra·china gita didianirangko on·angna a·dok sorkari baksa iani gimin nangrime kamko ka·na gita dingtang dingtang gisiko nanggipa dolrangni bakrimaniko nangnike aganenba, nambatgipa skie ra·ani cholrangko on·anichi skigiparangko gisiko nangatan baksa chasong damberangko uamangni skia-porako matchote ra·na didianikoba on·anggen ine ua agandapaha.
NPP-chi rikdilenggipa sorkarini on·kangengani gimin janape agananio, “skia-porani a·bao mongsong nangchongmotgiparangko chakatatpilna aro songadam biaprango skie ra·anirangko namdapatna gita MDA sorkari chu·gimik mangsongani gnang kamko ka·atenga” ineba Pa Sangma agankuaha.
A·gilsakko wate re·anggipa Pa P. A. Sangma sagini kamko gisik ra·atpilengon, “Angni pagipa sagi P. A. Sangma-ni MP ong·miting somoio MP Scheme-na on·gipani tangka-paisarangchi skulni mitam bakko rikataha, mande sakantina didianiko on·gipa uandakgipa dilgiparangni bimingrang bak dongpagipa gital skul nokko nokdonggae on·na gita cholko man·anio anga namen kusi ong·a,” ine skotong minister aganangaha.
