Agartala, March 8: Sak 60 membor donggipa state assembly-na seokataiako man·e BJP aro IPFT bakrime rikenggipa sorkarini gnigipa changna joljol a·doko sasonni bilko ra·piltaiani ja·man Pa Manik Saha, Tripura-ni skotong minister ong·e gnigipa changna Butbar salo ku·mikchetangaha.
Re·anggipa February 16 tariko Tripura a·doko gital memborrangko seokna gita eleksinko ong·atanggipao BJP-IPFT bakrime susaangenba gimik dam 32 seat-rango cheahachim.
Sorkario dingtang dingtang daitorangko jako ra·e kamko ka·na bil gnanggipa gimik 12 ministerrangoni, sakchet gipin MLA-rangkoba cabinet-o rimnapaha.
Seokako man·gipa gipin minister-rang jekai, Ratan Lal Nath, Pranajit Singh Roy, Santana Chakma, Sushanta Chowdhury, Tinku Roy, Bikash Debbarma, Sudhangshu Das, Sukla Charan Noatia-maang baksana skotong minister-na Butbar salo a·dokni Governor Pa Satyadeo Narain Arya-chi ku·mikchetataniko dakdilangaha.
Swami Vivekananda Maidan-o ku·mikchetangani somoio, a·songni Prime Minister Pa Narendra Modi, ma·mongni Home Minister Pa Amit Shah, BJP-ni padot Pa J.P. Nadda, Assam-ni skotong minister Pa Himanta Biswa Sarma, Manipur-ni skotong minister Pa N. Biren Singh, Arunachal-ni skotong minister Pa Pema Khandu, Sikkim-ni skotong minister Pa Prem Singh Tamang, aro gipin niksenggipa dilgiparangba dongpatokaha.
Batanggimin February 16 tariko assembly-na pu·onatgipao BJP dol, dam 32 seat-rangko cheaha, indake ong·engon, BJP baksa bakrimgipa Indigenous People’s Front of Tripura mangmang ge·sa seat-kosan chena gita man·aiaha.
Indake nikatna gita man·gen, chong·motan, 1993 bilsioni 2018 bilsiona kingking chu·gimik bilsi 25-rangna Tripura-ko sason ka·bagipa CPI-M-chi rikdilgipa Left Front sorkariko batanggimin 2018 bilsini eleksino amatani ja·man BJP skanggipa changna Tripura-o bil-sasonko jako ra·na gita a·bachengaha, jean ianpako eleksinko ong·atgipaoba manderangni seoktaiako man·e gnigipa changna joljol Tripura-o sasonnni bilko jako ra·piltaiaha.
A·doko songpanggipa tribal jato pangchake bikotgipa Tipra Motha Party (TMP) adita salrangna skang result-ko parakatgipao skanggipa changna dam 42 assembly seat-rango susae an·tangarin dam 13 seat-rangko cheenba gnigipa biapo chu·sokgipa ong·skaaha. Uandake, ianpakni eleksino CPI-M dam 11 seat-rangko aro Congress dol dam 3 seat-rangko cheaha.
