Shillong, July 12: PA Sangma Fellowship for Legal and Policy Research-ko Mongolbar salo, Meghalaya a•dokni Chief Minister Conrad K Sangma, Shillong songjinmani Yojana Bhawan-o nokdonggae on•angaha aro ia tom•anio a•dokni Law Minister James K Sangma, Chief Secretary RV Suchiang, Law Secretary CVD Diengdoh aro National Law School of India University-ni Prof Sony Pellissery-ba dongpae bak ra•angaha.
Ia PA Sangma Fellowship for Legal and Policy Research-ko nokdonggae on•angani somoio a•dokni Chief Minister, jinmana aganprakangengon, iandake niamrangko tarigipa fellowship & research-ko skangonin a•doko nangengachim ine parakangaha.
An•chingo civil service officer-rang aro a•dokko dilgiparang donggenchimoba niamrangko tarianio name u•i-ma•sigiparang ong•pajani gimin manderangni namgnina Judiciary aro Legislative-chi nangrime niamrangko tarie on•anian iani mongsongbatgipa miksongani ong•enga ineba Chief Minister aganaha.
Chief Minister-ni aganani gitade, name am•sandiani gnang niamrangko tarigenchimode pilak kamrangkon nambate chu•sokatna man•gen aro iako dakna gitara mande sakantini kamrangkon namdapatna gita nanggenchim.
PA Sangma sagiara saksa mikkim gnangbegipa mande ong•e Law, Journalism, Teaching aro Politics-ni kamrangko name ma•sigipaba ong•achim ineba a•dokni Chief Minister aro PA Sangma-ni depante aganaha.
Ia tom•anio a•dokni Law Minister James K Sangma-ba jinmana aganprakangengon, ia PA Sangma Fellowship for Legal and Policy Research-ko a•bachengataniara sorkari rikaniko mangkimbatatna aro sorkarini kamrango chatro chatrirangko bak ong•atna niksamsoaniko chu•sokatan baksana a•dokni officer-rangko uamangni kamrango nambatatna ja•ku de•aniba ong•enga ine parakataha.
