Williamnagar, Apr 28: Batanggimin bilsi 47-ni gisepo PA Sangma sagini nokdang, Tura MP-ni biapko ra•e dongahaoba Garo Hills-na maming kamrangkon ka•jaha ine Williamnagar-ni gitcham MLA aro Congress dolni saksa dilgipa Deborah C Marak-ni matnanganina, Meghalaya a•dokni Cabinet Minister aro NPP-ni working president Marcuise N Marak aganchakaniko on•angskaaha.
Bilsi 47-na PA Sangma aro uni nokdang, Tura MP-ni biapko ra•ahaoba Garo Hills-na maming kamrangkon ka•jaha ine Congress dolni dilgipa Deborah Marak matnangatenba, Garo Hills-o Jal Jeevan Mission-ni kamrang chu•sokgipa ong•jaha aro iani bidingo central agency-rangchi am•sandianirangko dakna nanga ine aganahachim.
Una agreba, Bangladesh-ona chinirangko niam gri badingsrukatengani gimin aro Myanmar a•songoniko niam gri guerangko ra•baengani gimin ua Conrad K Sangma-chi dilenggipa MDA sorkarikoba matnange aganahachim.
Adita salrangna skang, Arunachal Pradesh a•doko gipin garioniko tangkarangko man•ani giminba ua Meghalaya a•dokni Chief Minister Conrad Sangma-ko, a•dokni tangka paisarangko cha•uenba gipin a•dokrangona watatenga ine matnangatahachim.
Iandake Deborah-ni matnanganirangna aganchakaniko on•angskaengon, ua an•tangan PA Sangma-ni chasongo ka•anggipa kamrangni itihasko gualenga aro Garo Hills-o namroro silroroani kamrangko nikna gualengakon ine NPP-ni dilgipa aro a•dokni Cabinet Minister Marcuise Marak parakatskaaha.
“PA Sangma sagi an•chingna maiko dakkuja ukosa sing•ani ong•enga. Uni MP ong•engmiting somoirango ua Lok Sabha-ni Speaker ong•aha, Union Minister-ba ong•aha, Meghalaya a•dokna uni on•gilanirangko niatgenchimoba an•ching bang•en uni on•gilanirangko nikatna man•aha. Da•alo Garo Hills-ko ba Meghalaya a•dok gimik recognition-ko man•enga ong•ode PA Sangma sagini a•selsa ong•aha,” ine Marak talataniko on•angenba, Congress dolko dilenggipa Deborah Marak-ni agananiara, ia kamrangko nipilchengani gri Opposition dol ong•ani gimin aganani gitasan ong•enga ine parakataha.
PA Sangma sagini kosako iandake matnangani kattarangko aganahani giminba NPP-ni dilgipa Marcuise Marak, suk ong•gijaniko parakataha.
Jal Jeevan Mission-ni kamrang chu•sokgipa ong•ja ine matnanganina aganchakaniko on•angskaengon, “JJM-ni kamrangni gimin ua tale ra•chengna man•ode nambatgen maina JJM-ara namen transparent ong•gipa scheme ba programsa ong•ani gimin iako JJM dashboard-o talen mesokani donga. JJM-ni ning•o dingtang dingtang bakrang donga aro badia bakko ua chu•sokja ine matnangenga uko mesoke on•chengna man•ode nambatgen. JJM-ni payment-oba dakgualanina cholrang dongja indide maio pangchake ua JJM-ni kamo ong•gija dakanirang donga ine matnangenga?” ine Marak sing•doataha.
Bangladesh a•songona niam gri chini badingsrukatengani gimin aro Myanmar a•songoniko gue badingsrukbaengani gimin NPP-chi dilenggipa MDA sorkariko matnangatahani giminba ua suk ong•gijaniko parakataha.
“Ua saksa ja•delgipa dilgipa ong•e sorkariko iandake matnanganiara namen kragijani ong•a. Sorkariko chalaianio dingtang dingtang mechanism ba kolrang donga aro a•song damgnini gisepo badingsrukanirangko BSF aro uandakgipa dingtang dingtang dolrang nirokenga. Iani gisepon sorkariko iandake matnanganiara namen kragijani ong•a aro anga iandake matnanganiko raken jegala,” ine a•dokni PHE Minister Marcuise Marak parakataha.
Meghalaya a•dokni tangka paisarangko cha•ue gipin a•dokrangona watatenga ine Chief Minister Conrad K Sangma-ko matnanganina aganchakaniko on•angskaengon, “Badia obostako ua janapenga? Arunachal-o ong•gipa obostani gimin ua janapenga ong•ode ua somoio tangka baksa rim•ako man•gipa gariara CM-ni convoy ki•sango re•baenggipa garisa ong•a aro ua gari baksana tangkarangde CM-ni ong•ja. Iani bidingo Arunachal Pradesh a•dokni Longding district official-rangba talataniko on•manpilaha. Ua (Deborah) a•dokni namgnina chanchibebegipa dilgipa ong•ode maini gimin indita bilsirangna ua Williamnagar constituency-ni ning•on namroro silroroaniko ra•bachengna man•jaha? Da•o Williamnagar jillani ramako ua (Deborah) an•tangan ka•engachim indiba kamrangko name ka•jaenga aro kamrangko dontongkuenga. Loyola School-ona re•gipa ramakoba Deborah an•tangan ka•engachim indide ua saksa a•dokna aro a•dokni manderangna ka•sagipa mande ong•bebea ong•ode maini gimin kamrangko name chu•sokatjaenga?” ine Marak sing•doataha.
Na·simang ia video-koba nina man·gen:
Na·simang iakoba poraina man·gen: Matchu cha•ugipa ine potchipenba sak 3 manderangko Assam-ni Dhubri a•jao doka
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
