Shillong, Feb 20: Tura-o rikgitalgipa P.A Sangma Sports Complex-o a·songni Prime Minister Pa Narendra Modi-ni West Garo Hills-ni skotongona re·baan salo rally-ko ong·atchakna gita West Garo Hills a·jani District Administration-ni on·na jechakanio NPP-ni skotong dilgipako BJP dolni matnange agananganina, National People’s Party (NPP)-ni padot aro skotong minister Pa Conrad K Sangma, Mongolbar salo raken jegalataha.
Sports Complex-o PM-ni rally-ko ka·chakna on·gijanio uni maming jak dongja ine aganangengon, eleksinna gimik dakgipa rally-ko ka·nan India-ni Election Commission-sa bilko on·enga aro uni ge·etanirangkosa District Administration-ba ja·rikatenga ine aganatan baksa, rally ka·chakna biapko on·gijanio NPP dolko aro angko iano bak nangchapate matnanganide ong·chongmotja aro anga an·tangba chingni rally-na permission ba bilko on·giminrangko gualja ineba Pa Sangma parakataha.
Iarang gimikan eleksinmitingode ong·rongbewalsa, indiba, BJP dolsa ia mamlako dal·atenga. A·bachengon chinga ia stadium-ko bak gni dakaniko aganmanaha, skanggipa bakara, Football Stadium, jekon matchotaha aro nokdonggaaha aro bakgipinara, Indoor stadium aro swimming pool ong·skaa jeni kamkon atagriksan matchotengkua,” ine skotong minister u·iatangaha.
PM-ni rally-ko ka·chakna gita bilko on·gijanide, jensomoio PM Modi-ni programme-ko kal·chakramo ong·atjokon manderang bang·telaigen, aro kal·chakram biapni samsirang ong·telaigipasa ong·ani gimin manderang bang·dugaode nosto ong·na gita district administration kenchakani dongenggen aro gari-gorarangko donchakna biapba donggijani gimin ong·naba gnang ine NPP-ni padot chanchiatangkoba parakataha.
Tura-ni PA Sangma Sports Complex-ara a·songoni ge·sa dal·batsranggipa kal·chakram biap ong·enga aro ia stadium-ko Pa Conrad Sangma-ni dilenggipa a·dok sokari, re·anggipa bilsi December jani 16 tariko dal·bee programko ong·atenba nokdonggae on·angahachim ine nikatna gita man·gen.
