Shillong, Dec 12: A·chik matgrik Pa Togan Nengminjani-ni siani bilsi chang 149-gipako gisik ra·e maniani bak gita, Health Minister Pa James K Sangma, a·dokni skotong Shillong-ni Synod College-o Pa Togan Nengminja sagini nitobegipa noksako Sonibar salo oprake on·angaha.
Salgipino, Azadi Ka Amrit Mahotsav ba India a·songni jakgitelani bilsi 75 gapaniko maniani bak gita East Garo Hills a·jani Chisobibra songo Pa Togan Nengminja Sangma-ni siani salko dal·e maniangaha, jeon Williamnagar Constituency-ni MLA aro sorkarini Chief Whip Pa Marcuise N Marak-ni dongpaa baksa Meghalaya Sorkarini Advicer Pa Thomas A Sangma mongsonggipa sokgipa ong·aha, unbaksana Williamnagar-ni MDC Pa Alphonsus R Marak, Deputy Commissioner Pa Swapnil Tembe aro a·jani gipin officer-rangba dongpae salni program-ko mikkim gnangdapataha.
Rimchaksoaniko, MCS officer Tra Y.W. Momin-chi dakangaha aro programo dingtang dingtang skulni bi·sarang knatobee gitrangkoba ring·angaha.
Tom·ao mongsonggipa sokgipa ong·e jinmana aganangengon, skango gita bilchi-jakchi, an·chi-pari nikgrikachi dakgrikna nanggija, da·oni somoio, u·igipa, seng·gipa, sapgipa matgrikrangko an·chingna nangenga jemangan uamangni u·iani aro seng·aniko jakkale Pa Togan Nengminja sagini dakgrika gita an·chingna dakrikchakgen ine Pa Thomas Sangma parakataha.
Tom·anio, Pa Marcuise N Marak, Pa Togan Nengminja-ni A·chik a·songna sichakaniko indin ong·atgija A·chik a·songni namgnina sakantikon ku·cholsan ong·e kam ka·china ku·mongange, Covid-19 sajinmani tikarangko su·e ra·tokchinaba sakantikon mol·molangjolaha.
Unomiting, Williamnagar-ni MDC Pa Alphunsus R Marak-ba tom·ao aganangpae, Pa Togan Nengminja indinari Bristish-rangko warachaksoa ong·jaengnaba gnang, indiba uamangni namgija miksonganirangko ma·siesa ua warachaksoaha. Uni gimin, Pa Togan Nengmija-maang gita dakgipa manderangni janggitangko on·chakaniko pilakan dal·e ra·na nanga ine didianiko on·angaha.
Bon·chotao, Pa Togan Nengmija Sangma Memorial Association-ni jakrika Pa John N Sangma-chi mittelpilani kattarangko agane matchotataha.
