Shillong, Feb 23: Dolni padot ong·aoniko Pa Ernest Mawrie-ko ra·galsranganiko uamangoni bang·bata dilgiparangan nangniktokenga ine skotong ministerni aganangachi dolko bak ong·atna jotton ka·enga ine BJP dolni dilgipani matnange agananina aganchakanio, maming sakki gri skatang matnangaiani pal pa·sokode Meghalaya Democratic Alliance sorkarioni ong·kate katangchina ine dakchakgipa skotong minister Pa Prestone Tynsong, Sombar salo a·dokni BJP dolko ra·bie agantaiaha.
“Da·o sorkariko rikenggipani bak ong·pae sorkariko matnangdopilani pal na·songni (BJP) bakrimaoni ong·katangachi kattarangna bate kamrangchi jinmana kakketko mesoksrangchina,” ine Pa Tynsong, Sombar kobor ra·timgiparangna aganaha.
Pilak neng·nikanirangko MDA coordination committee-o namatahaoba, maming pangchakani gri MDA sorkarini kosako dondikgija matnanganirangko dakenga ine aganenba, bakrime rikanio suk ong·nikteljaode wate katsrangaibo ine angni agangipa kattaon anga da·oba ga·chate aganenga. MDA sorkari inditan cha·bokgipasa ong·ode na·songni minister maina ching baksa ka·rimkuenga?” ine ua sing·doaha.
Garo Hills Autonomous District Council (GHADC)na pu·onataniko ong·atna mikkang-mikkang manderangni vote-rangko salnasa ian BJP dol dakmikbaenggipa kamsa ong·a ine jaksi otengon, bakrimaoniko BJP dolko ra·galani gimin chingni gisepo maming chanchia dongkuja ine sing·anirangna aganchakan baksa, maini gimin chinga uamangko ra·galgen, suk ong·nikjaode bakrimaoni wate katsrangon nambataigen. Chinga gimikni gisepo raken ku·rachakgrikgimin donga indiba uamang (BJP) matnangatango kim·kim ong·ode aro MDA sorkari inditan cha·bokani gnang ine nikode, bakrimaoni maina ong·kate katjaenga, unosa manderangba bebean ia dol mangmangsan cha·bokanina kakket ong·e kam ka·gipamancha ine agangen,” ineba dakchakgipa skotong minister parakataha.
A·dokni saffron party-ko manderangni vote-rangko man·na mangmang tol·mikjachina aganengon, “Chinga gimik chanchirimesa je-jani giminba tik ka·enga aro na·simangoni saksa MLA ching baksan minister ong·enga. Uni gimin, maina da·on iani gimin kamko ka·jaenga ine BJP dilgiparango sing·na sika? Kattana bate kamrangchi mesokan bilakbatgipa ong·gen ine anga chanchia, unode MDA sorkario cha·bokanina beben ia dolsa kamko ka·manchaa ine Khasi ba A·chikrangba agangen. Ong·kate katsrangon, ong·nasienggipa eleksino haida bang·a vote-rangko man·naba donga ba bang·batachi chena man·naba donga, ine Pa Prestone Tynsong ra·bie aganangaha.
Indake, sokbaenggipa GHADC eleksinna NPP dol uamangni susaatnasienggipa candidate-rangko ru·utgijan parakanggen ineba Pa Tynsong u·iatjolaha.
