Guwahati, March 9: Pakistan-ni agent-rangna SIM card-rangko on·srukenganiko ning·joljol kobor on·atako man·ani ja·man am·sandiataniko dakatenba Assam-ni Nagaon aro Morigaon a·jarangoniko sakbonga manderangko Assam police mija Butbar salo rim·aha ine koborna parakataha.
Rim·a man·gipa sakbonga manderanga, Nagaon-oni Ashiqul Islam, Bodor Uddin, Mijanur Rahman aro Wahiduz Zaman, aro Morigaon a·jaoni saksa Baharul Islam ong·a ine ma·sina gita man·aha.
Uamangko rim·ani bidingo Assam police-ni ku·wattimgipa Prasanta Bhuyan-ni kobor ra·timgiparangna aganatani gita, damgni district-rangoni sak 10 manderangni dingtang dingtang SIM card-ko tarigipa service provider-rangoniko niam gri SIM card-rangko ra·bae adita sak Pakistan-ni ISI agent-rangna on·srukengani gimin ning·joljol koborko man·soaha aro ian a·songni kosako kamko ka·ani gita ong·a ine parakataha.
Koborko on·atanio pangchake, kate chakgipa manderangko rim·na gita police dol am·sandianiko a·bachengate ja·mano uamangko rim·na man·aha aro saksaoniko ge·gni IMEI nomborrang donggipa ge·sa mobile phone-ko man·aha jechin uamang Whatsapp gita call ka·na aro foreign embassy-na koborrangko on·na gita jakkalachim, ine police official parakataha.
Rim·a man·giparangni dongenggipa nokoniko, ge 18 mobile phone, ge 136 SIM card, ge·sa fingerprint scanner, ge·sa high-tech CPU aro birth certificate, passbook aro photograph-rangkoba man·aha ine police koborna u·iataha.
