Boko, Dec 4: Boko a•jao donggipa A•chikrangni ge•gimin guerangko pang hajal batpile den•galahani gimin, ua jolo songdongenggipa A•chikrang, Forest Department-ni kosako jegale Budhbar salo  jingjengatangaha.

Ia jingjengataniko, Garo National Council (GNC), Garo Women Council (GWC) aro Garo Youth Council (GYC) nangrimenba dakdilangaha aro ia tom•bimonganio dingtang dingtang songrangoni sak 500 mangna batpile A•chikrang bak ra•angaha.

GNC-ni Padot Enindra Marak tom•anio aganengon, November 28 tariko Forest Department-ni dolrang Nogodonga songona re•baaha aro komila aro gue ge•gipa bagan-ona sokahaon, dal•drobaenggipa gue pangrangko hajal mangna batpile den•galaha ine aganaha. Unbaksana, ua jolo songdongenggipa manderangna u•iata gri aro maming agan golpogrikani grian den•galaha aro ian Chaygaon Revenue Circle-ni ning•o ga•akgipa a•a ong•achim ineba Marak aganaha.

Forest Department-ni ka•enggipa iandakgipa kamrangna songni manderang namen gisiko ka•o nangani nakataha.

Reserve ka•gipa buringko sekdraenga inenba, A•chikrangni dongchakenggipa biaprangkosan ia Forest Department man•dikatrongenga, uamang maming saloba Rabha, Boro aro uandake gipin jatrangni dongchakenggipa biaprangona re•angan dongkuja ine Majhata songni Ronindra A Sangma matnangataha.

Una agreba, A•chikrangni kosako Forest Department-ni iandake ka•saninggija ka•gipa kam skanggipa ong•jaha indiba bang•a somoion re•bae dakrongenga aro West Kamrup Division-o ga•akenggipa gipin songni ge•gipa guerangkoba den•gale galaha ine ua jolo songdongenggipa manderang matnangaha.

Iani bidingo Bamunigaon Range Officer Aminul Islam-ni kosako sing•aniko dakon, ua a•a Bogai Reserve Forest jolo ga•aka aro West Kamrup Forest Divisional Officer Subodh Talukdar-ni forest reserve jolo ga•akenggipa a•ao ge•gipa guerangko den•e galchina ge•etaniko man•ani giminsa uamang den•aha ine aganchakaha.

Indake, ia gue baganko a•bachengna gipinchiko sro snamesa gueko ge•ahachim aro da•alo pilakan bon•aha ine gue den•gala man•gipa bagan nokgiparang mikchi ong•e aganaha.

Indake ong•engani gisepo, uamangni ka•gimin kamni bidingo seachi u•iatchina dabiangna aro forest department-ni kosako Gauhati High Court-o badi ka•angna gita ia tom•anio uamang tik ka•angaha.

Na·simang ia video-koba nina man·gen: 

Na·simang iakoba poraina man·gen: 5-Star Aurika Hotel-ko Skotong Minister oprake on•a

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub