Shillong, May 3: Bang·gija salrangni gisepon Sohiong constituency-o ong·nasienggipa eleksinna mikkang-mikkang, a·dokni politicalo ong·enganirangko knasoani gita, People’s Democratic Front (PDF) dolni Pa Banteidor Lyngdoh (Mawkynrew-oni) aro Pa Gavin M Mylliem (Sohra-oni), ia sakgni MLA-rang re·baenggipa May-ni 6 tariko National Peoples’ Party (NPP) dol baksa bakrimnasienga ine a·dokni skotong minister Pa Conrad K Sangma, parakataha.
PDF dolni sakgni MLA-rangni NPP baksa bakrimeanichi sak 60 memborrang gnanggipa Meghalaya Legislative Assembly-o NPP dol, gimik sak 28 MLA-rangchi bilakdapgnok aro ian re·baenggipa May-ni 10 tariko Sohiong-o eleksinko ong·atna mikkang-mikkang ong·enganiko nikna gita man·enga.
Ua sakgni MLA-rangni NPP baksa bakrimna am·enganiko, a·dokni skotong minister aro NPP dolni padot Pa Conrad Sangma, Sohiong-o ong·nakenggipa eleksinna dolni candidate Pa Samlin Malngiang-na campaign ka·chakange a·jani dingtang dingtang songrangchi Mongolbar aro Butbar wal nangchape wenroroe manderangna aganprakangani somoio parakataha, jeon Pa Sangma, Lawmei, Nongpathaw aro Kreit songni manderang baksa agangrika baksanaba songni manderangming apsan chrokanio bakko ra·angpaaha.
Eleksinna campaign ka·anganio, mande jinmana aganprakangengon, Pa Sangma, da·alo bang·a politicalni dilgiparang NPP dolona katnapbaenga, apsandaken, UDP-ni dilgiparangba NPP dolo napetoknasienga aro da·obatai PDF dolni Central Executive-ni tom·aniko ong·atenba dolni dilgiparang aro uamangni MLA gimikan National People’s Party baksa bakrimna tik ka·angaha ine parakataha.
Re·baenggipa eleksino NPP dolna vote on·china gita songni manderangko didiangengon, eleksinna skangde manderang, sawa skotong minister ong·gen aro badia dol sorkariko rikgen iani gimin u·isorongjachim, indiba ia somoio badia dol bil-sasonko jako ra·enga aro a·dokni skotong ministera sawa aro NPP-san a·jana aro constituency-na namroro-silroroaniko ra·bana man·gnikoba Sohiong-ni manderang u·itokmanaha, uni gimin NPP-na vote-ko on·e cheatanian gisik gnangni kam ong·gen ineba skotong minister aganangaha.
Gipin dolrang jekai Congress aro UDP-ni MLA-rang gong kror 2 -ni MLA scheme-rangko bilsianti man·naba donga, indiba skotong minister -ode gong kror 17,000 scheme-rang manderangna dongskaa, uni gimin NPP dolko cheatgenchimode baditana kingking namroro-silroroaniko ra·bana man·gen iako manderang chanchiatna gita man·gen ineba NPP-ni padot parakangjolaha.
