Tura, Feb 17: Drug Abuse ba pekgipa samrangko jakkalanichi mandena pilakni gitan gimaaniko ra·bana man·ani gimin da·al Budbar salni bako dingtangmancha awareness program-ko Tura-ni Government Girls Higher Secondary School-o ong·atangenba, pekgipa sam aro uandakgipa gipin bosturangoni chel·e dongchina Tura-ni chadamberangko aro mongsongbate poraienggipa chatro chatrirangko didiangtokaha.
Ia awareness program-ko West Garo Hills a·jani District School Education Office baksana District Administration, District Social Welfare Office aro District Maternity & Child Health Office, ong·atangaha aro ia program-ko ong·atanio West Garo Hills a·jani Deputy Commissioner Ram Singh, jinmana aganprakengon, pekatgipa sam aro gipin bosturangko jakkalani a·sel bang·a manderangan janggirangko gimaatna nangaha aro janggi tanganio chu·sokgipa ong·na man·tokjaha ine talatangenba, pekatgipa sam, chu, ta·makku aro uandakgipa bosturangko jakkaljachina poraienggipa chatro chatrirangko didiangaha.
Ia sal somoirango skulrango poraienggipa bang·bata chatro chatrirangan, ta·makku aro uandakgipa bosturangko jakkaltokengani a·sel poraianirango chu·sokgiparang ong·na man·jaenga ine talatangengon, iandakgipa ong·sigipa kamrango jak on·gija an·tangtangni janggi tanganio chu·sokgiparang ong·na man·na gita bimchipe poraichina gita Singh, chatro chatrirangko didiangaha.
Ia program-ko ong·atanio dongpae chatro chatrirangna agan-talate on·anggipa gipin manderangara, District Mental Health Program-ni Clinical Psychologist Narbecca Momin, Tura Govt Girls HS School-ni Principal Ela Begum, District School Education Officer In-charge CA Sangma aro gipinrang ong·a.
India a·song gimikon da·ororo pekatgipa samrangko jakkale bang·a chadamberangan nosto ong·atako man·tokengani gimin ia ong·sigipa kamko gimaatna gita India sorkarini ning·o donggipa Social Justice & Empowerment Ministry, Nasha Mukt Bharat Abhiyan program-ko a·bachengate a·song gimikon, pekatgipa bosturangko jakkalani namgijani bidingo mikrakatanirangko on·enga ine nikna man·a.
