Tura, Sept 12: Niamchi raken champengatgipa pekatgipa sam ba drug-rangko jilla ba songjinmao palsruka ra·bagipa ine chanchichipenggipa bosturangko man·ani ja·man Tura, Dobasipara gittim joloni sakgittam manderangko West Garo Hills police rim·aha ine koborko man·soaha.
Niam gri iandake pekatgipa bosturangko badingsrukgiparangko rim·na sandirikkitataniko dakengmitingo Selsella-ni Agipgrenggre jolni ramao police-rang sakgittam manderangni re·bagipa Maruti 800 (ML 10 5575) gari bolsako dongdipate sandiataniko dakon uamangoniko heroin ba pekatgipa sam gm 10.22 baksana a·mang rongni pekatgipa sam jekon brown sugar ine chanchichipenggipa gm 92.54 mangko man·aha. Iana agreba, gong hajal 57,500 tangkarangko ra·bitakoba man·aha.
Sakgittam rim·a man·gipa manderangara – Dobasipara-ni Matgrik Ch Marak, Dobasipara, Daren Agal-ni Jaksram Ch Marak aro apsan gittimoni Bringstar Ch Marak-maang ong·a.
