Shillong, March 10: Meghalaya a·doko pekatgipa samrangko niam gri skatang jakkalaniko bon·atna gita ja·kurangko de·atenganio, East Khasi Hills District Police-ni Anti Narcotics Task Force (ANTF) baksana Lumdiengjri Police Station-ni officer-rang nangrime mija Bristibar attamo champengatgimin pekgipa samrangko badingsrukgipa sak-bonga manderangko Lower Mawprem-oniko rim·aha.
Pekgipa samrangko palbadingenggipa manderangni kosako am·sandiataniko dakanio, skanggipao, mija Bristibar attamo saksa mandeko Shillong, KHADC office sambaoniko rim·aha, uandake, gm 66.46 mang ong·gipa heroin bakos ge·bongako, ge·gni mobile phone-rangko aro gari bolsako uoniko sekaha.
Apsan somoion, Lower Mawprem jolo pekgipa bosturangko palbadingengani koborko ning·joljol man·ani ja·man Mawprem joloniko am·sandiataniko dakenba sakbri gipinrangko rim·dapaha aro ge 20 bakosrang aro ge 20 sam botolrango donggipa gm 268.71 ong·gipa heroin-ko, ge 7 mobile phone-rangko, tangka nogot gong 6,87,150/-ko, bangbanggipa ge 25 sam botolrangko aro ge 60 syringe-rangko uamangoniko man·aha.
Indake ong·engon, rim·a man·gipa manderangni kosako niam gita ja·kurangko de·atan baksa mamlarangko segataha aro uamang baksa bak donggipa gipinrangni gimin tale ra·na gita sing·sandiatanikoba dakataha ine koborna parakataha.
