Tura, Feb 7: Meghalaya a•doko petrol aro diesel-ni damrang tang•dorikrikengani a•sel a•doko songdongenggipa manderang aro mongsongbate gari gora jakkalenggipa manderang neng•nikanirangko chagrongna nangtokengani gimin knal February 8 tarik waljatchi dipet petrol aro diesel-ni damko litre-prako gong gni ka•e komiatna a•dok sorkari tik ka•angaha.
Iani bidingo a•doko songdongenggipa manderangna u•iatengon, petrol aro diesel-ni damrangko bariatahani a•sel a•doko songdongenggipa manderang neng•nikanirangko man•tokengani gimin petrol aro diesel-ni damko February-ni 8 tarik waljatchioni gong 2/- ka•e komiatgnok ine a•dokni Chief Minister Conrad K Sangma parakataha.
Petrol aro diesel-ni damrang tang•dorikrikengani gimin gari pararangkoba bariatskachina dabie aro para salenggipa garirangni kajinarangko komiatchina dabie, Khasi aro Jaintia Hills a•jarango para salenggipa garirangni mande salruraaniko dontongate jingjengatanirangko daktokengachim ine nikna man•a.
Iandake jingjengatanirangko dakengani a•sel Shillong songjinmaode taxi-rang dongjaenba, manderang re•ruraanirango namen neng•nikanirangko chagrongna nangtokskaengahachim.
