Jowai, Oct 26: Jaintia Hills a·jaoni para salruraenggipa dolsa organisation, All Jaintia Commercial Vehicle Association (AJCVA)ni bimango petrol aro diesel toni damrang tang·doani kosako aro para salruragipa gari-gorarangna permit-ko on·ani damko bariatanina Jaintia Hills a·jao Mongolbar salo jegalaniko dakangaha.
Ia jingjengatanio a·jolni gimik gimang dol kolatchina baten gari para salruraenggipa dingtang dingtang organisation-rang bak ra·angaha jeon, ma·mong sorkarini a·dok damgittamna on·gipa permit-ko rang·san bon·ate nangtelaigipa All India Permit-kosan ra·gatanina para salruraenggipa garini nokgiparang aro gariko salenggiparang uamangni suk ong·gijaniko parakangtokaha.
Uamangni u·iatani gita, iana skangde a·dok damgittamna on·gipa permit-na bilsio gong 2900 kosan uamang gamna nangaiachim, indiba nangtelaigipa All India Permit-ko ra·gatanichi AC grigipa garirangna bilsio gong 15000 ko aro AC gnanggipana gong 25000 ka·e uamang gamna nangskagnok.
Iani bidingo Jowai Shillong Tourist Cab Association-ni jakrikra, John Lyngdoh-ni u·iatani gita, sorkarini ia ja·kuko de·enganiko uamang ra·chakna man·jawa maina Khasi aro Jaintia Hills mangmangosan uamang songregiparangko salruraenga ine aganenba, da·o sorkarini iako ra·gatanichi uamangna bate neng·nikanikosa ra·badapgen ineba ua janapataha.
“Permit-na aro kajinako gamnasan chinga kamaiaiode dedrangko chinga maichi aldugen? ine duk man·bee John Lyngdoh, ia mamlako gong·rakkale nirokatpachina gitaba a·dok sorkariko mol·molataha.
Jingjengataniko East aro West Jaintia Hills biap damgnion ong·ataha ine janapatengon, sajinmani a·sel a·dokko chipatani ja·man petrol aro diesel toni damrang tang·doahani gisepon Transport department-ni dongimin niam gitasan parako ra·engani gimino kamaianio uamang neng·nikanirangko chagrongna gita nangenga ine AJCVA-ni padot Paila Lyngkot u·iataha.
Unbaksana, All India Permit-ko ra·gatanichi mongsongbate lockdown-ni ja·man a·dok-chigako nina-rona re·bagiparangko salruraenggipa garini nokgiparangna neng·nikaniko ra·bagen ine janapatan baksa, ia u·iataniko ra·galchinaba ua, sorkariko mol·molangaha.
Jegalaniko Jowai jillao donggipa para salruragipa gari-gorarangko donram biap damantion dakangaha jeon gari salgiparang aro garini nokgiparang, a·dok aro ma·mong sorkarini kosako lekka pal·takrango seachi jegalaniko nikangna gita man·aha aro para salgipa garirango gisim ba·rani nisanrangko kachape mesokanikoba dakangjolaha.
