Shillong, Feb 17: A·doko petrol aro dieselna kajinani damrangko taridapna bon·kamgipa anti dake donenba Mongolbar salo a·dok sorkarini tik ka·anggiminko Meghalaya Cabinet da·al Butbar salo ra·chakangaha.
Ian ra·rone palenggipa petrol aro dieselni kajina ba tax component-oniko litre prako gong 2 ka·e komiatanina sorkarini tik ka·angani aro da·o gital dake taritaigimin toni damrangko ra·chakani bidingo ong·enga ine cabinet-ni tom·a matchote skotong minister Pa Conrad Sangma u·iataha.
“Iana skang chinga gong 2 ko tik ka·angahachim, indiba mijalo chinga changsatai petrol aro diesel tona kajinani damko gital dake taritaiaha, uni gimin changgni tik ka·anggiminko da·al salo cabinet-o ra·chakaha,” ine skotong minister Conrad Sangma aganaha.
Janapna gita, mijal Mongolbar salo Meghalaya Democratic Alliance sorkari iana skang petrolni damko litre prako gong 2 ka·e komiata baksana petrol toni damko Shillong-o litre prako gong 5.4 ka·e komidapatna gita sorkari tik ka·angaha. Indake, Shillong-o da·o petrolni dam February 16 waljatchionide Shillong songjinmao litre prako gong 85.86 ka·e ong·eaha jean a·dokni gipin district-rangode on·tisa dingtanggrikani gnang.
Apsandake, petrolni damko iana skang litre prako gong 2 ka·e komiatanga baksana uni damko litre prako gong 5.1 ka·e Shillong-o komidapatna gitaba sorkari tik ka·angaha. Indake, petrol toni gital damara da·o Shillong-ode February 16 waljatchionide litre prako gong 79.13 ka·e ong·skaaha aro iani damko a·dokni gipin district-rangode on·tisa dingtanggrikani gnang.
Petrolna komiatgipa Value-added tax (VAT)-ara jean iana skangde 30.62 per cent ong·achim uko da·o 20 per cent komiataha ba litre prako dong 15 ka·e ong·skaaha. Indake diesel-na tik ka·gimin VAT-ara jean iana skangde 22.95 per cent ong·achim ba litre prako gong 12 ka·e ong·achiam uko da·o 12 per cent komiataha ba litre prako gong 9 ka·e ong·eskaaha.
A·dok sorkarini ia gital damko tik ka·anichi da·o Meghalaya a·doko petrolni damara gong 91.26 oni gong 85.86 ona tang·onaha aro diesel toni damara litre prako gong 84.23 oni gong 79.13 ona tang·onskaha.
Iana agreba, koela cho·atanina bhara ra·giparang, schedule caste ba schedule tribe ong·oba stamp duty-ni 100 percent-kon apsan gamna nanggen ine kacharini ge·etaniko on·anggimino pangchake koela cho·na bhara on·ani stamp duty-ko 100 percent-ko ra·gatna tik ka·anikoba cabinet-o da·al ra·chakangjolaha.
