Guwahati, Feb 22: Ia bilsio Assembly-na pu·onataniko ong·atnasienggipa Assam aro gipin a·dokrango eleksinko ong·atani sal ba tarikrangko Election Commission-chi mikkang March jani skanggipa antirangon parakatnaba dongaha ine a·songni Prime Minister Pa Narendra Modi, da·al Sombaro jinmao aganchipilangaha.
“Batanggimin changode (2016 bilsio), Assam-o assembly eleksinko ong·atani tarikko March jani 4 tarikon parakataha, ianpakba March-ni skanggipa antion ekeksinko ong·atani tarikrangko parakatna ka·dongsoenga, indiba ian Election commission-ni chu·gimik kamsa ong·a ine da·al salni bako salaram Assam-ni Dhemaji district-oni Silapathar songo tom·aniko ong·atgipao tom·bagipa mande jinmani mikkango Pa Modi aganprakangaha.
“Mongsonggipa eleksinrang ong·na mikkang-mikkang, Assam, West Bengal, Puducherry, Tamil Nadu aro Kerala a·dokrangchina anga amadipet wenna jotton ka·gen,” ine da·al salni bako, gas, to aro skia-porani a·barango namroro-silroroaniko ra·bana gong kror 3,222-mangni gimik ming-bonga dal·dalgipa project-rangko a·bachengate on·angan baksa pangchakani ro·ongko songe on·angani ja·man a·songni Prime Minister parakataha.
Ia bilsio Assembly-na pu·onataniko re·baenggipa April aro May jarangni gisepon Assam, West Bengal, Tamil Nadu, Kerala aro Puducherry a·dokrango ong·atangnaba gnang.
Chief Election Commissioner (CEC) Pa Sunil Arora-ni dilanio Election Commission-ni chu·gimik bench, eleksin ong·nasigipa gimik dam-bonga a·dokrangchinan wenangeming a·jani political party-rang, officialrang aro gipinrang baksa tom·e agan-chanchirimaniko dakangmanaha.
Ia bilsio pu·onatenggipa gimik dam-bonga a·dokrangchina Election Commission-ni a·gipi officialrangba adita changrangan wenangeming assembly-na pu·onatanio pilak tarisamsoanirang gimikkon nipilangaha.
