Shillong, April 3: Central Bureau of Investigation (CBI)-ni bilsi 60 gapanina Diamond Jubilee-ko maniani bak gita, India a·songni Prime Minister Pa Narendra Modi, gital rikgipa CBI office complex-ko Shillong, Pune aro Nagpur-rango Sombar salo, New Delhi-ni Vigyan Bhawan-oni internet gita online nokdonggae on·angaha.
Iana skangde, Meghalaya a·doko CBI-ni pangkamgipa office dongkujachim, uandaken Shillong-ni Oakland jolo nokko para ra·chengesa CBI office-ko ka·kuaiengani gimino officer-rang kam ka·chakna biaprang apchangket ong·anichi bang·a neng·nikanirangko chagrongna gita nangpilaha ine nikatna gita man·gen.
Indake ong·engon, kamrangko nambate ka·angna man·na gita CBI, uamangni pangkamgipa office nokko Shillong-ni Mawdiangdiang jolo rikataha.
