Shillong, May 01: Prime Minister-ni a·songni manderangna aganprakrongenggipa 100-gipa Maan Ki Baat episode namen chu·sokgipa ong·aha aro ia chu·sokanina a·dokni gita chinga dal·a gadango manianiko dakangaha ine Meghalaya BJP-ni dilgiparang Sombar salo janapangaha.
Ua salara uamang gimikna namen dal·begipa sal ong·chongmotaha aro iako a·song gimikan aro a·gilsak gimikan sakki ong·a, aro ia chu·sokakaniko manianio a·dokoni ge 50 na bata mandal-rang bak ra·angtokaha ine dolni padot Pa Ernest Mawrie janapataha.
BJP-ni ku·wattimgipa aro MLA gitcham Pa Hima Shangpliang, Mann Ki Baat programni gimin aganangengon, ian a·songni manderang aro PM-ni gisepo nangrimgrikaniko dakani ong·a, aro iandakgipa cholchi a·songni kangal nokdangrangko gronge PM, uamang baksa agangrikaniko dakan baksa, an·tangtangarichi bading-chiwalaniko a·bachengenggipa manderangna didianikoba on·enga ine parakataha.
“PM-ni Maan Ki Baat programni salo, Manipur a·dokoni saksa me·chikni mongnalni kildingchi ba·rarangko sika-koa gita apsandaken, Meghalaya-ni Syntein songni me·chikrangba bostu ra·chakanirangko wa·a aro rerangchi wate taritokaha ine janapatengon, ia songni gimin a·gilsakni manderang u·itokkujachim, indiba 99-gipa episode-o PM-ni aganprakangani somoio ua songni manderang baksa mikkanggrike golpona cholrangko dake-ka·e on·aha jenan Mawsynram-ni manderang screen-o mikkanggrik a·songni PM baksa agangrikna man·e kusi ong·tokbeaha,” ine Pa Shangpliang aganangkuaha.
Mann Ki Baat program-ni ja·manchide a·palchini manderang Syntein songni gimin nambate ma·sina gita cholko man·aha aro uamangni sol·e-repe tarigimin bosturangkoba brena gita manderang nangniktokaha, jenan da·ode songni manderang five star hotel-rangna aro manderangna online gita bosturangko palatna cholko a·bachengataha ineba Pa Shangpliang janapatjolaha.
