Baghmara, Jan 7: South Garo Hills a·jani ning·o PMGSY Scheme-ni sorokrangko taria matchotgija galchipe donengani gimin Garo Students Union (GSU), Karukol Regional Unit mija Bristibar salo kamrangko jako ra·enggipa contractor-rangni kosako badi ka·angaha.
Iani bidingo GSU, Karukol Regional Unit-ni koborna seachi talatani gitade, “Pradhan Mantri Gram Sadak Yojana (PMGSY) scheme-o pangchake kam ka·na nanggnirangko PIU-chi, IAP-ni ning·o work order on·ani jaskuon kamrangko matchotatna nanga aro batbeoba ja chi·chet (18)nasan somoiko on·achim. Unbaksa, dolongrangko kana ja kolgrikbri (24)ni gisepon matchotna nanga, indiba dolong kagiminrangko taridappilna nangode bilsibonga somoiko on·a,” ine GSU taldapataha.
PMGSY-ni miksonganiara, songadamrangona altuae re·a-doani rama-jallangrangko namdapatchina, songrango nengrae janggi tangani cholrangko on·china, high school, higher secondary school-rang, sanram biaprangona re·a-doani sorokrangko taridape on·china aro songsaoni-songgipinona nadikgrikgipa sorokrangko taridapchina on·gipa ma·mong sorkarini scheme ong·a.
Indake ong·genchimoba, kam ka·na nanggnirangko jako ra·enggipa contractor-rang kamrangko ka·gija aro matchotatgija donchipani a·sel songni-nokni ramram manderang bilsi gimikan neng·nikaniko chagrongtokenga ine GSU, Karukol Regional Unit-ni padot AZ Matsram N. Marak koborna seachi u·iataha.
PMGSY-ni ning·o on·gimin sorokrangoni – Karukol A·dinggre-oni Alokpang Songmong-ona km 5.9 ong·gipa PMGSY sorokko Togan K. Marak niroke kam ka·ani ong·achim, Nengkong-oni Upper Dosogre-ona km 9.2 ong·gipa PMGSY sorok, Karukol-oni Nengkong, Emangre aro Tolegre-ni PMGSY sorokko MP Agarwal Pvt Ltd-na pakwatahachim. Bul A·kawe-oni Rewak Kambepal-ona km 6.42 ong·gipa PMGSY sorokko Guwahati-ni M/S R Royal Construction matchote tarie on·na gita jako ra·achim aro Rongru A·sim-oni Bul A·kawe-ona km 2.45 ong·gipa PMGSY sorokko Baghmara-ni contractor Purim A. Sangma jako ra·achim, indiba kamrangko matchote ka·gija galchipe donani gimin GSU, uamangni kosako PWD-ni Executive Engineer-na lekka sedoenba badi ka·aha ine parakataha.
Indake ong·engon, ia PMGSY sorokrangko tarigija galchipe donenggipa contractor-rangko gisiko nange an·tangtangni kamrangko ka·piltaie on·china mol·molanga baksa PMGSY-ni niam gita South Garo Hills a·jani ning·o dingtang dingtang PMGSY sorokrangko gong·rakkale taridape on·chinaba GSU dabiangjolaha.
