Tura, Aug 1: Sombar pringo, Anti Narcotics Task Force (ANTF)-ni official-rang, police constable Ajay Chettri minggipa mandeoniko gram 10.53-mang ong•gipa ‘Heroin’ samrangko man•aha.
Police-rangni u•iatani gitade, ia pekatgipa samrangko Shillong-oni saksa Khawbok Diengdoh minggipa mande, Chettri-ni jako on•atengachim aro uamang sakgnikon police-rang rim•aha.
Ia police constable-ko Tura-ona re•angenggipa Ria Travels Night Super bus garioniko rim•aha aro uandaken police-rang, ia bus garini driver, handyman aro bus garini nokgipa Arup Nag, Suresh Burman aro Shankar Dalu-koba sing•sandina gita rim•angaha ine kobor on•aha.
Police-rangni u•iatani gitade, constable Ajay Chettri-ko rim•ani ja•man bakan uko kamonikoba dontongataha.
West Garo Hills Police-rangni koborko man•soani ja•man, Shillong-ni police-rang, Khawbok Diengdoh-ni nokonikoba am•sandieaha aro uni nokoniko bang•gija ‘Heroin’ samrangko man•aha ine kobor on•aha.
