Guwahati, Nov 17: Assam-ni Tinsukia district-o saksa police officer-ko satkape dolni bimangko ong·siata inenba dolni saksa me·chik dilgipako kam dondipataha ine Sombar salo Assam BJP dol koborna parakataha.
Iani bidingo koborna seachi u·iatanggipao, state unit-ni skotong dilgipa Ranjeet Kumar Dass doloni state committee executive member Dipanjali Kakoty-ko kamoniko dondipataha.
Police officer saksani kamtangko ka·mitingo kragija bewalrangchi uko champenganina aro uni indake dolna krat-cha·ataniko ra·baani gimin Kakoty-ni kosako mamlakoba segatangaha ine u·iataha.
Me·chik saksako doka-satani mamlao nangchape sing·rikkianiko dakna gita police station-ona okamatako man·gipa an·tangni driver Srikant Phukan-ko drae jokata baksana Assam BJP-ni executive member, Kakopathar police station-ni sub-inspector (SI) Apurba Das-koba satkapaha.
Kakoty-ni kosako mija November 8 tariko mokordomako segatanggipao, BJP-ni dilgipa ua officer-ko kam bon·atgen ine skotong minister Pa Sarbananda Sonowal-ni bimingko ra·e ka·mikkenataha aro uko satkapaha ine Das matnangaha.
Ua (Kakoty) da·o kate chakenga. Indake ong·engon, uni kragijagipa bewalna, doka-satanina aro manderangna dangdike on·enggipani kamtangko ka·mitingo champenganina Kakoty-ni kosako police mamla segataha.
