Agartala, Aug 11: Trinamool Congress (TMC)-ni sak 13 dilgiparangko rim•anina jegalanirangko dakahani gimin TMC-ni national general secretary Abhishek Banerjee baksana gipin sak 5 dilgiparangni kosako Tripira Police, mokordomako ka•aha. Tripura a•doko COVID-ni niamrangko pe•ahani gimin police-rang, TMC-ni sak 13 dilgiparangko rim•ahachim.
Agartala-oni km 55-mang chel•ao donggipa Khowai Police Station-o officer-in-charge (OC)-ni FIR ka•anio, West Bengal a•dokni Education Minister Bratya Basu, MP Dola Sen, TMC-ni dilgipa Kunal Ghosh, Tripura-ni gitcham MLA aro da•o Tripura-o TMC-ko dilenggipa Subal Bhowmik baksana sakgipin Prakash Das-koba biming mingaha.
August-ni 7 tariko Teliamura-o rim•ako man•gipa Debangshu Bhattacharjee-ko man•chape TMC-ni sak 14 dilgiparangko grongna gita uamang Tripura-ona re•baahachim.
Robibar salo Debangshu aro TMC-ni gipin sak 13 dilgiparangko Khowai Police Station-ona rimbaon, Abhishek aro TMC-ni gipin sak dilgiparang, uamangko watpilchina gita niam gri police-rango dabiahachim.
Robibar salo TMC-ni sak 6 dilgiparang, Khowai police station-o kragija dake jegalanirangko dakaha aro police-rangni kamko champengna jotton ka•aha ineba police-rangni FIR-o matnangaha.
“Uamang kontasa batpile police-rangni kamko champengaha aro uamangni champengani a•sel rim•a man•gipa manderangko somoi gita kachario mikkangpaatna man•jaha,” ine police-rangni badi ka•anio parakaha.
Debangshu aro TMC-ni gipin sak 14 dilgiparangko, Teliamuri-ni National Highway-08 samba jolo, COVID-ni niamrangko pe•e jingjengatanirangko dakengmiting somoio police-rang rim•ahachim. TMC-ni dilgiparangko BJP-na kam ka•enggipa manderang kragija dake chadrapa ine matnangenba, uamang jegalanirangko dakengachim.
Abhishek aro gipin dilgiparangni Khowai police station-o jegalanirangko dakani ja•man, rim•a man•gipa TMC-ni sak 14 dilgiparangko Robibar attamchibara First Class Magistrate-ni mikkango mikkangpaataha aro ja•mano uamangko jamino watpilaha.
Jamino watpilako man•ani ja•man uamang Kolkata-ona re•angpile TMC-ni dilgipa aro West Bengal-ni Chief Minister Mamata Banerjee-na badi ka•eskaaha.
