Shillong, Aug 23: Adita salrangna skang, Shillong songjinmao so·sojengjeng ong·engmiting somoio police-rangoniko ra·e katgipa INSAS rifle ponggittamko Sombar salpaksachibara Umkhrah chiringoniko man·pilaha. Ia silchidarerangara, Mawkynroh-Umshing outpost-o donggipa police-rangni silchidarerang ong·achim.
Assistant Inspector General of Police (A) GK Iangrai-ni u·iatani gitade, re·anggipa August-ni 15 tariko Mawkynroh-Umshing Outpost-oniko cha·uanggipa INSAS rifle ponggittamko Fire & Emergency Service-ni Search & Rescue Team (SRT) aro East Khasi Hills a·jani police-rang, Umkhrah chiringoniko sandie man·pilaha.
Ia silchidarerangko sandianio dakchakanirangko on·ahani gimin Mawlai-ni dilgiparangko aro chittiko seatenba police-rangna u·iatahani gimin jolni chadamberangko Meghalaya Police mittelpilatenga ineba Iangrai parakataha.
Re·anggipa August-ni 15 tariko, dolsa chadamberang, Mawkynroh outpost-o kam ka·enggipa police-rangni silchidarerangko ra·sekenba, police-rangni Scorpio gari gisimkokoba ra·e katangahachim aro ja·mano ia gariko Jaiaw-o so·chipe galahachim.
August-ni 13 tariko Hynniewtrep National Liberation Council (HNLC)-ni gitcham dilgipa Cheristerfield Thangkhiew-ko police-rangni so·ote galani gimin ding·chaoe jolni chadamberang, iandakgipa kamrangko ka·ahachim.
