Shillong, June 5: Politics-o Khasirangna bate Garorangan gisikni gita brebata ine Sombar salo, Meghalaya a•dokni Cabinet Minister aro sorkarini ku•wattimgipa Paul Lyngdoh parakataha.

Iani bidingo kobor ra•timgipa manderang baksa agangrikengon, Garorangde an•tangtangni dilgiparangko seokanio gisikni gita breaniko mesokaha indiba Khasirangde pilak kamon indinari ku•rang on•e rotokaia ine Lyngdoh parakataha.

Lyngdoh-ni parakatani gitade, 2023 bilsini election-oba Khasi Hills-ode Khasi chief minister-nasa dabie rotokaha indiba Garo Hills-ode iandake dabie roaigija dam 24 seat-rangoni dam 18-kode NPP-na on•e Khasi CM-na ka•donganiko bon•atskaahachim.

Garorangde iandake dabie rogiparang ong•ja indiba Khasirangsa indinari dabie rogiparangde ong•a ine UDP-ni dilgipa aganaha.