Shillong, July 27: Ri Bhoi a•jani Nongpoh sambao donggipa Nongkhrah songo Polytechnic Centre-ko rikna indin on•gipa a•ako ra•pilna gita Nongkhrah Nonglyngdoh-ni dilgiparang, Meghalaya sorkarina ka•mikkenataniko on•angaha.

2018 bilsioni rikna a•bachengatgipa Polytechnic Centre-ko rika matchotgija galchipahani gimin talataniko on•china gita antigni somoiko on•ani ja•manoba sorkarioni maming aganchakanirangko on•jahani gimin songni dilgiparang, ia a•ako ra•pilna gita ka•mikkenataniko on•angaha.

Ia Polytechnic Centre-ko Nongkhrah songo rikna gita 2018 bilsio gong kror 7 tangkarangko chame, ja 24-ni gisepon matchotatna gita nisanko donahachim indiba gong kror 2-ni skanggipa tangkarangko watatani ja•man ia polytechnic-ko rikenggipa contractor, matchotgija galchipaiahachim.