Shillong, Nov 6: Apsan skulo porairimska sakgni bi·sarangko mija bilsio chio sripnasiaoniko naljokateming uni ka·donge daka kamchi East Khasi Hills district-ni Mawryngkneng songoni saksa bilsi 12-ong·gipa Everbloom K Nongrum minggipa me·a bi·sa, Jeevan Raksha Padak Award, 2019-ko cheaha.
Uni ka·donge daka kamna, a·songni President Pa Ram Nath Kovind-ni jakchi on·anggipa ia boksisko East Khasi Hills-ni Deputy Commissioner Isawanda Laloo-ni jako mija Bristibar salo pakwatataha.
Indake janapjolna gita man·gen je, mija bilsi 2019, July jani 17 tariko East Khasi Hills, Mawryngkneng Community and Rural Development Block-oni saksa bilsi 9 ong·gipa me·a bi·sa Davin Sohtun minggipa jean Radiant Adventist Secondary school-o class III-ko poraienggipa chatro ong·a, maming pakmarang kadula donggijagipa gimik jadokrangna galchipe dongipa meter-gittammang tu·gipa a·kol, jeon mikkarang waanichi chi gape dongachim uchina ga·akangaha. Everbloom, jean ua somaio Mawryngkneng Higher Secondary School-o class VI-ko poraiaengachim uni chrikako knae rang·san katangeming a·kolchina bilonange uni chi ringpeknasiaoniko naljokataha.
Ua apsan biaponiko, mija bilsi 2019, July jani 23 tarikoba sakgipin bilsi 8-ong·gipa me·a bi·sa Wanphai Rani minggipa jean apsan skulo class III-kon poraigipa ong·a, ripengskarang baksa kal·grike romitingo apsan a·kolon rimilsrote ga·akanggipako apsan mandean (Everbloom) naljokattaiaha.
Bilsi chonengkuon uni ka·dongbee daka kamrangna East Khasi Hills, Deputy Commissioner, Everbloom-ko dingtangmancha mittele aganaha.
Indake ong·engon, apsan a·kolo changgni joljol obosta ong·ani ja·man sakgipinrangnaba namjawa ingipao daitoko ra·gipa ua a·kolko dapaha ine District Magistrate u·iataha.
Jeevan Raksha Award-ara, ian chio sripao, a·selo ga·akao, wa·al kamao, karen nangao, ong·telaigipa obostarango, a·ningni gamko bikotao ba ugita a·selo ga·akgiparangko naljokate nama kamko ka·giparangna Union Ministry of Home Affairs-ni u·irikanio India-ni President-ni jakchi on·gipa gamchatgipa boksis ong·a.
