Jowai, Aug 28: Ia bilsini SSLC, HSSLC aro Graduation porikkarango 80 percent bate man·gipa chatro chatrirangna Sonibar salo, Jaintia Students Movement (JSM) Central Body-ni gita, brigipa Academic Excellence Award-rangko on·e, Jowai-ni Tpep Pale-o donggipa Yungwalieh Community Hall-o mande ra·pilskaanirangko dakangaha.
Ia program-ko ong·atanio Meghalaya a·dokni Education Minister Lahkmen Rymbui mongsonggipa sokgipa ong·e bakko ra·angaha aro unnbaksana West Jaintia Hills School
Education & Literacy-ni Joint Director LS Lyngdoh aro gipinrangba dongpae bak ra·angaha.
Ia program-ko ong·atanio a·dokni Education Minister, jinmana aganprakangengon, an·tangtangni janggi tanganio chu·sokgiparang ong·na man·na gita gisiko nangbate poraichina chatro chatrirangko didiangaha.
East Jaintia Hills a·jao government college-ko kulichina JSM dolni dabienggipani gimin janapatengon, ia jolni college damgittamde da·o People’s College Scheme-ni ning·o ong·ahani gimin bilsio gong kror 10-ni namgnirangko man·engaha ine Lahkmen parakataha.
Kiang Nangbah College-mangmangkosan skie ra·chakani biap dake ra·jachina chatro chatrirangko didiangengon, Jaintia Hills-o da·o damchet college-rang dongahani gimin gipin college-rangoba poraina cholrangko ra·china Education Minister didiangaha.
Iana skang, JSM central body-ni president Lenning Star Rymbai-ba jinmana aganprakengon, Jowai-o donggipa Kiang Nangbah Govt College-o chatro chatrirang biaprangko man·na neng·engahani gimin East Jaintia Hills a·jao government college damsako kulidapna nangengaha ine parakataha.
