Shillong, Feb 14: Meghalaya Energy Corporation Limited (MeECL)-o tangka paisani gita neng·nikanirangko charongna nangengani a·sel aro Power Grid Corporation of India Limited (PGCIL)-na gong kror 74.65 gro dongkuengani a·sel Meghalaya a·doko da·o bijoliko kimittaina nangao ga·akengaha.
MeECL-ni Chairman aro Managing Director AK Kembhavi-ni u·iatani gitade, PGCIL-na MeECL, gong kror 74.65 gro dongkuenga indiba ia grorangko MeECL, da·o dipet tangka paisarang dongjae chotna man·kujaenga.
“MeECL-o kam ka·enggiparangnan chinga neng·esa dormaharangko on·na man·enga. PGCIL-na gro dongkuenggipa tangka paisarangko gamna man·na gita chinga adita salrangna skangsan gong kror 113.47 tangkarangko on·e dakchakchina gita a·dok sorkario mol·molatahachim aro da·o iani bidingo a·dok sorkari chanchikuenga,” ine Kembhavi parakataha.
Ia grorangko gamna man·kujaengani gimin PGCIL-ni gita u·iataniko on·manaha ineba MeECL-ni Chairman parakataha.
Kembhavi-ni aganani gitade, antisani gisepon ia grorangoni 50 percent-ko gamna ku·rachake bangki 50 percent-ko gamna gitaba somoiko talatchina PGCIL u·iataniko on·manaha.
Iandakgipa obostarangko chagrongna nangengani a·selan da·al February 14 tarikni wal 12:00 baji dipet Meghalaya a·doko bijoliko kimitna nangao ga·akaha ine Kembhavi parakataha.
