Shillong, Nov 14 : North Eastern Hill University (NEHU)-ni VC Shukla, Budbar walo, Education Department-ni Prof. Sherwin May Sungoh-ko Shillong campus-ni aro Garo Department-ni Prof. Fameline K Marak-ko Tura Campus-ni Pro Vice Chancellor-na seokgenchimoba, North Eastern Hill University Students’ Union (NEHUSU), Khasi Students Union (KSU-Khasi Unit) aro North-Eastern Hill University Teacher’s Association (NEHUTA) dolrang jegalataha aro indake da•lo chatro chatrirangni okgimu chake jingjengatani sal 10 gapengaha.
Re•anggipa November jani 5 tarikoni ia jingjengataniko a•bachengatenba, November 6 tarikoni campus ning•aona napani aro ong•katanikoba champengataha. Chatro chatrirang, VC-ko kam watchina dabian baksana niamgri kamo rakkigipa Registrar aro Deputy Registrar-ko kamoniko ra•galchina gitaba dabianiko dakenga.
NEHUSU-ni general secretary, Toniho Kharsati, VC-ni Shillong aro Tura-na Pro Vice Chancellor songe on•aniko raken jegala ine u•iatengon, uamang VC-ko kamoniko ra•galchinasa ia okgimu chake jegalaniko a•bachengataha. Mijal attamon uamangni dabianina namgipa aganchakaniko on•gen ine CM-ni aganchakani gimin, VC-oniko koborna sengsoengon, VC-ni campus-ko wate re•angani koborni pal, uni Pro Vice Chancellor seoke on•aniara chatro chatrirangna ra•chakna man•gijani ong•aha aro iako uamang jegalaniko dakanggen ineba budbar walo parakataha. Niamni gitade Assistant Registrar (Planning)-de iako parakatani ong•jachim iako parakatna bil donggipade Joint Registrar (Establishment)-sa ong•achim.
Indake ong•engon, NEHUTA-ni President Prof. Lakhon Kma, VC jean da•o campus-oni kate dongengachim, uni Pro Vice Chancellor-ko songe on•aniara chatro chatrirangni okgimu chake jegalaniko bringbrangatnasa dakaha ine aganangaha.
Campus-oni kate dongeba, VC, online gita tom•bimongani aro ge•etanirangko on•a jotton ka•enga, jean niamni a•palo ong•a aro uni campus a•palo donge pilak ge•etanirangko on•aniara kraani ong•ja aro uamang iako ra•chakna gita man•jawa ineba ua parakataha.
Iani bidingo, Hub News-na kobor ra•timgiparang, appoint ka•a man•gipa Prof. Sherwin May Sungoh aro Prof. Fameline K Marak baksa agangrikna jotton ka•beahaoba chu•sokna gita man•jaha.
Ia appointment-ko uamang ra•chakama ra•chakjawa u•ina gita man•kujaengon, Prof. Kma, ia sakgni professor-rangkon appointment-ko ra•chakjachina gita mol•molangaha.
Na·simang ia video-koba nina man·gen:
Na·simang iakoba poraina man·gen: NEHU-ni VC, Shillong aro Tura Campus-na Pro VC-rangko songe on•anga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
