Tura, Sept 29: Adita salrangna skang, Purakhasia jolo me•a bi•sa saksako, ro•ong salenggipa truck gari bolsani saldape siatani gimin Budbar salo Greater Purakhasia Area Peace Committee-ni gita jegalgrimaniko mesokna jinma tom•e re•jomaniko ong•atangaha.Ia jinma tom•e re•jomaniko ong•atanio dingtang dingtang skulrango poraienggipa chatro chatrirang, skigiparang, toromko dilgiparang, songko nokko dilgiparang aro dingtang dingtang dolrangba bakko ra•angaha aro ia a•sel ong•anina kalimpaanirangko parakangtokaha.Re•anggipa September-ni 25 tariko Dalu jolchipakni Mahendraganj jolchipakna ro•ong salangenggipa truck gari bolsa Purakhasia jolo donggipa Kotchuadok songni bilsi 5 ong•gipa me•a bi•sako saldape siatahachim.Ia jinma tom•e re•jomaniko ong•atanio Peace Committee-ni dilgiparang, sianggipa me•a bi•sani janggina aro uni nokdangna bi•chakanirangko dakangengon, iandakgipa a•sel ong•anirangko champengna man•na gita ia jol gita ro•ong salaniko ta•raken dontongatchina gitaba sorkario dabiangtokaha.Ia a•selni bidingo Purakhasia jolo donggipa pilak skulrangkon Bristibar salo salsana chipe donchina gitaba Peace Committee-ni dilgiparang didiangaha.