Shillong, Nov 9: Lok Sabha-ni gitcham Speaker PA Sangma sagini somoirangonin A•chikrang, Meghalaya a•dokko bak dakna skani dongjachim ine Rajya Sabha-ni MP Dr WR Kharlukhi, mitam A•chik dolrangni Garoland a•dokna dabienggipani bidingo parakataha.
Iani bidingo kobor ra•timgipa manderang baksa agangrikengon, skang somoirangonin a•dokko bak dakchina dabianirang donggenchimoba PA Sangma sagide a•dokko bak dakna skani dongjachim aro Garo Hills-ni manderangba iani bidingo unbaksa bakrimaniko on•ahachim ine Kharlukhi parakataha.
Salgro salaram a•dokrango songdongenggipa Tribal manderangara chonchongipa jatrangsan ong•aia aro ia chonbegipa a•dokrangko bak dakkugenchim ong•ode mamingan dongsrangjawaha ineba Dr Kharlukhi aganaha.
National People’s Party (NPP)-ko manderangni gisepo ku•cholsan ong•atna gitasa bikotaha ine janapatengon, NPP-ni niksamsoanian salgro salaram jol gimikko ku•cholsan ong•atani ong•enga, jedakode maiba kamrangko dabina Delhi-ona re•angengon, komibeoba sak 15 ba sak 16 MP-rang apsan re•ange ku•rangko on•na man•gen ine NPP-ni state president talataniko on•angenba, a•dokko bak dakroroe dongaigenchimode a•dok bilakgipa ong•na man•chipjawa aro ma•mong sorkariba dabianirangko knachakjawa ine parakataha.
