Tura, July 19: Bangladesho sorkari kamko dingtangmancha ma·ate donani bidingo jing·jengon poraigiparang, sorkarina chakgiparang aro policeni gisepo nangtinggrikani ong·aha, jeon sak 39mang siaha aro sak 2500 baten poraigipa chadamberang saknaako man·aha.
Sorkarini kamko 1971 bilsio dakgrikgipa sipairangni nokdangrangni manderangna dingtangmancha 30% donna tik ka·aniko re·anggipa jao High Court parakaton uko jegale jing·jenganirang a·bachengaha. Indaken ong·on, High Courtni rai on·aniko Supreme Court dondikataha aro re·baenggipa August jani 7 tariko sorkarini katta ra·baako bichal ka·e on·na tik ka·e donaha.
![](https://hubnetwork.in/wp-content/uploads/2024/07/WhatsApp-Image-2024-07-15-at-11.52.25-AM-e1721025045761.jpeg)
Indake kam a·kange donani bidingo poraigiparangni jing·jengatani a·sel 2018 bilsio quota systemko ra·gale galahachim.
Quota systemko ra·galchina gita sorkariko dabitokenga, maina uamangni nikanio indake kam kange donania Sheikh Hasina-ni dilenggipa aro sorkariko chalaienggipa Awami League partyni manderangnasan namgni ong·aia. Ia quota systemko Sheikh Hasina uni manderangnasan on·aia ine matnanganirang ong·kataha.
Indake ong·oba Prime Minister Sheikh Hasina dabianirangko ra·chakna jechakaha aro jing·jenggipa dolko “razakar” ine chantokaha. 1971 bilsio Pakistan baksa dakgrikanio a·songtangna chakgija Pakistan sipairangming dol dakgiparangkon razakar ine chonnike agantoka.
Quota systemko Bangladesho 1972 bilsio a·bachengatahani ja·mano gital gital dake nipilaha. 2018 bilsio ra·gale galna skangde sorkario kam ka·e cha·ani 56%ko dingtang dingtang dolrangna a·kange donachim.
Da·o Bangladesh gimikon so·sojengjeng ong·enga. Jing·jengatgiparang baksa police dolni nangtinggrikani Dhaka songjinmana agreba gimikchian gipenga. Ong·enga obostani bidingo Budbar salo Sheikh Hasinani televisiono aganaonin golmal bilongbataha, maina batesa obostarang namjabataha aro jing·jengatgiparang Bristibar salo a·songni broadcasting buildingkon so·aha.
![](https://hubnetwork.in/wp-content/uploads/2024/06/Poster_page-0001-663x1024.jpg)
Indake ong·engon, Meghalayaoni re·ange Bangladesho poraienggipa chadamberangna naljokaniko on·na kam ka·enganiko Meghalaya a·dok sorkari parakataha. Bangladesho jachange dongenggipa Meghalayani chadamberangko rimbana gita a·dok sorkari Bangladesh High Commission, Dhaka aro Chittagongo donggipa Indian High Commission, Dawkio donggipa Landport Authority aro Exporter Association baksa nangrime kam ka·enga.
Na·simang ia video-koba nina man·gen:
Na·simang iakoba poraina man·gen: CM baksa tom•ani ja•manba kam ka•e cha•enggipa gipin jatrangko KSU sandiangkugen
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub