Tura, Jan 18: North Garo Hills-ni Raja A•pal songo A•chik Baptist Mondoli-ni bilsi sotbonga (50) gapaniko ba Golden Jubillee-ko maniangaha.
Ia Golden Jubilee-ko re•anggipa January 14 tarik Bristibar saloni January 17 tarik Robibar salona maniangaha.
Ia Golden Jubilee-ko maniaona Achik Baptist Mondoli-ni dingtangdingtang Krima-rango kam ka•giparang aro dilgiparang re•bae bakko ra•angaha.
Raja A•pal Mondoli-ko 1971 bilsini February 10 tariko Mondoli songchengaha.
Indake Mondoli songchengani somoio Pa Ekdunald Sangma sagi Pamong ong•chenge gipin sakbri Deacon-rang baksa Isol-na an•tangtangko on•kange Raja A•pal Mondoli-ko re•dilangan baksa Isol-na dangdike on•angaha.
Apsandake Pa Starson Momin, Raja A•pal Mondoli-ni skanggipa Secteray ong•chengaha aro unbaksa Wilson K.Sangma Accountant,Jibarson Shira Treasurer ong•e Mondoli-ko chalaidilchengaha.
“Ritchachisku Sotsnisa-ni February Chikung tariko songchengaha Raja A•pal Mondoli-ko,
Chasong gisik ra•na da•alo bilsi sotbongajok Raja A•pal Mondoli,
Golden Jubilee ong•jok, Chasong Gisik ra.nok.
Mitele ring•bo, on•tokbo mitele hai Isol-na rasongko,
Golden Jubilee-na Isol-ni rakkiana, chasongni chasongna” ia miksonganio Raja A•pal Mondoli, Golden Jubilee-na Itihas-ko tariaha.
