Shillong, Oct 28: Budbar attamo, Rajabala constituency-ni Garodubi songo National People’s Party (NPP) aro Congress dolna kam ka•enggipa manderangni dinggrikani ja•man mande sakbriko rim•aha.
West Garo Hills a•jani Deputy Commissioner Ram Singh-ni u•iatani gitade, ia a•sel ong•anio jak donggipa mande sakbriko police-rang rim•aha aro iani bidingo am•sandianirangko dakengkua.
Dolgni dinggrikanio bang•a manderangan jak dongani gimin police-rang, ia a•selni bidingo mokordomako ka•e gipinrangkoba rim•na sandiengkua ineba Singh parakataha.
Ia a•sel ong•ani ja•man Rajabala constituency-o Section 144 CrPC-koba ra•gatangaha.
Indake ong•engon, Rajabala-o dolgni dinggrikaniara rang•gitik a•sel ong•anisan ong•aia aro bakan ia so•sojengjeng ong•aniko namatpilna man•aha ine Meghalaya a•dokni Chief Electoral Officer (CEO) FR Kharkongor parakatskaaha.
Ia a•sel ong•ani ja•man maming so•sojengjeng ong•anirangko knasona man•jaha aro ia jolrangko mikrakbate nirokchina gita ua West Garo Hills a•jani DC aro Returning Officer-ko didiataha ineba Kharkongor parakataha.
Bristibar salo dingtangmancha East Khasi Hills aro West Garo Hills a•jani deputy commissioner-rang tom•e chanchirimangna gita sienga aro ia tom•anio Chief Nodal Officer baksana SP-rangba dongpae bakko ra•anggen ineba CEO parakataha.
Ia tom•anio Rajabala-o ong•anggipa obostani giminsan ong•aigija election-ni somoio chel•chakanirangko on•ani giminba chanchirimanggen ine Kharkongor parakataha.
CEO-ni u•iatani gitade, ia jolrango maming so•sojengjeng ong•anirang dongtaijana gita police-rang, pilak biaprangkon re•rurae nirokenga.
Meghalaya a•dokona ma•mongoni sipai dolbriko watataha aro ia sipai dolrangko, damgittam Assembly constituency-ni kenchakna nangbatenggipa polling station-rango donatgen ineba Kharkongor parakataha.
Kharkongor-ni aganani gitade, ia kenchakna aro simsakbatna nangenggipa polling station-rangoni dam 29-de Rajabala constituency-o, dam 8-de Mawryngkneng-o aro dam 10 polling station-de Mawphlang constituency-ni ning•o ong•enga aro ia polling station-rango ma•mongni sipai dolrang baksana a•dokni police aro home guard-rangkoba donatgen.
