Tura, Oct 27: Rajabala constituency-o uni dongkame campaign ka•ahani gimin opposition dolrang kentokaha indiba ua Rajabala constituency-o songdongenggipa manderangni nangnikani aro neng•nikanirangko ma•sie ra•na gitasa Rajabala constituency-o donge campaign-ko ka•aha ine Budbar salo, Meghalaya a•dokni Chief Minister aro NPP-ni national president Conrad K Sangma parakataha.

Saldokna kingking ua Batabari-o dongkame Rajabala constituency-ni a•brirango aro a•kawe jolrangoba NPP-ni candidate Abdus Saleh-na campaign ka•angahachim.

A•kawe jolrango pilakni gitan namroro silroroaniko ra•bana NPP miksongenga ineba campaign ka•ani bon•kamgipa salo Sangma, Rajabala constituency-ni manderangna parakangaha.Congress dolni kosako matnange aganangengon, Rajabala constituency-o NPP bilakbana kenesa gitcham chief minister Mukul Sangma aro uni jonggipa Zenith Sangma, NPP-ni bidingo manderangna tol•e aganenga ineba Conrad parakataha.2018 bilsiode Rajabala constituency-ni manderang Congress dolko seokaha indiba ia changode obostarang dingtanggnok ineba ua aganaha.

“A•doko NPP dolan sorkariko dilenga aro pilakni gitan namroro silroroaniko ra•bana jotton ka•enga. Ia bye-election-o Rajabala-ni manderang sorkariko chalaienggipa dol baksa nangrime NPP-ko chegipa ong•atna nangchongmotenga,” ine Sangma aganaha.

Meghalaya a•dokni damgittam bye-election-on NPP altuae chegipa ong•gen ineba ua an•tangni ka•dongsoenganiko parakataha.