Baghmara, April 26: South Garo Hills a·jao mongsonggipa chibimarangoni damgni, chong·motan Kanai aro Mahadeo chibimarangko rama tarienggipa company-rang nisigalengani gimin jolo songdongenggipa manderang, suk ong·gijaniko parakattokaha.
Koborko on·ani gitade, Baghmara-oni Ranikor-ona rama tarienggipa NHIDCL company, Mahadeo chibimaoniko an·chengrangko kitengani a·sel ia chibimani a·pa aro chio donggipa jonturang nisigalako man·engahachim.
Ia ramako apalbatate tarianio, kitgimin a·arangko Kanai chibimao galskaenga aro uandaken ia chibimani jokaniko champengata gita dake, ia chi dingtang rama gitasa jokskaengaha aro uandaken ia chibimako nisigalengaha ine kobor on·timgiparang parakataha.
Ia ramako tarianio, South Garo Hills a·jani mongsonggipa chibimarangko nisigalengani gimin Budbar salo, A·chik Youth Welfare Organisation (AYWO) dolni membor-rang, dingtangmancha South Garo Hills a·jani Deputy Commissioner-na sedoatenba, ia chibimarangko nisigaljachina gita ta·raken ge·etaniko on·china dabiangaha.
