Shillong, June 7: East Khasi Hills a·jao aro mongsongbate Shillong songjinmao lockdown-ko ra·dodapattaiahani a·sel ramasamrango palbadinge cha·paenggiparangde janggi tangani cholrang dongjae neng·nikanirangko chagrongna nangtokengahani gimin Sombar salo, ramasamrango palbadinge cha·enggiparangni dol, East Khasi Hills a·jani District Magistrate-ko grongenba, uamangkoba salsa watchange dokkanrangko dake cha·pana cholko on·china gita sorkariko didiangaha.
COVID-19-ni giproroaniko champengna gita lockdown-rangko ra·gatanichi pilak manderangan neng·nikanirangko chagrongna nangtokengoba, ramasamrango palbadinge cha·enggiparang aro mongsongbate me·su samjakrangko game ge·e pale cha·giparangsa neng·nikanirangko chagrongna nangbatengachim ine nikna man·a.
Indake ong·engon, a·dokni pilak biaprangon ramasamrango palbadinge
cha·enggiparangkode palna sim·na on·jaengani a·sel janggi tangani cholrang dongjae neng·nikanirangko chagrongna nangtokengani gimin ramasamrango me·su samjak aro ma·manti bosturangko pale cha·paenggipa manderangkoba salsa watchange pale sim·e cha·na cholko on·china sorkariko mol·molangaha.
Iani bidingo Thma U Rangli-Juki (TUR) dolni gitaba, ramasamrango pale sim·e cha·enggiparangna ku·rangko on·angaha aro uamangni janggi tangani giminba chanchie cholrangko on·china gita sorkariko didiangaha.
