Shillong, Sep 14: Meghalaya a•dokni dingtang dingtang biaprango donggipa ramasamrango ma•manti bosturangko palbadinge cha•enggipa manderangna dingtang biapko on•chenggijade ra•gale galna sorkari miksongani dongja ine Budbar salo, Meghalaya a•dokni Deputy Chief Minister Prestone Tynsong, ku•rachakaniko on•angaha.
Assembly-o Mawlai MLA PT Sawkmie-ni ra•bagipa zero hour notice-na aganchakaniko on•angengon, ramasamrango palbadinge cha•enggipa manderang skatang biaprangko ra•gope manderangni aro gari gorarangni re•ruraanirangko man•dikatjana gitasa sorkari ia ja•kuko de•aha ine Tynsong parakataha.
Ramasamrango palbadinge cha•enggiparangna a•dok sorkari neng•nikaniko ra•bana miksonga dongja ine talataniko on•angengon, ramasamrango palbadinge cha•enggipa manderangni neng•nikanirangko niatna aro ramarango palbadinge cha•enggiparangna apsan niamko ra•gate on•na miksonganio a•dok sorkari, Meghalaya Street Vendors (Protection of Livelihood Regulation of Street Vending) Rules 2022-ko ra•gale, India sorkari tarigipa niam Street Vendors (Protection of Livelihood and Regulation of Street Vending) Act, 2014-ko ra•gatskana gita ia Session-o dingtangmancha Bill-ko ra•baaha ine Tynsong parakataha.
Ia Bill ba Act-ara, bading chiwale cha•enggiparangko sandina, badinge cha•enggiparangko biming segatna, palbadinge cha•ani biaprangko on•na, biming segatgimin badinggiparangko badingchakram biaprangona apjitna aro uandakgipa kamrangna niamko on•gen ineba ua parakataha.
Deputy Chief Minister-ni parakatani gitade, Meghalaya Street Vendors (Protection of Livelihood Regulation of Street Vending) Rules, 2022-koba a•dok sorkari u•iatmanaha.
Meghalaya a•dokni jillarango palbadinge cha•na gita niamrangko tarina a•dok sorkari, Meghalaya Street Vendors (Protection of Livelihood and Regulation of Street Vending) Act, 2014-ko pass ka•ahachim aro uni ja•man Street Vendors (Protection of Livelihood and Regulation of Street Vending) Rules, 2017 aro Street Vendors (Protection of Livelihood and Regulation of Street Vending) Scheme, 2017-koba tariahachim.
A•dokni ia Act ba niamni ning•o, dam 6 Municipal town-rango badinge cha•enggipa sak 1249 manderangko biming segatahachim. Ia sak 1249 badinge cha•giparangoni sak 342-mangmangsan Shillong songjinmao biming segatgimin badinggiparang ong•skaaiachim.
