Brisbane, Oct 04: Namen ra·bianirang gnanggipa kamo chu·soktaianio, Garo Hills-oni saksa jawilwat tarina changbegipa Dominic Megam Sangma-ni taritarigipa gital jawilwat “Rapture,” ingipao, adita sal skang Australia-ni Brisbane-o ong·atgipa Asian Pacific Screen Awards-o chubegipa gadangni boksis ba award-ko man·taiaha aro ia chu·sokaniara uni skanggipa jawilwat “Ma·ama” ingipao award-ko man·ani bilsi-bongarang ja·man ong·taipilaha.

“Rapture,” ba Rimdogittanga ingipa jawilwat, jekon iana skang Locarno Film Festival-o mesoke on·angchengahachim, iano ua Meghalaya-ni Garo Hills a·jao dingtang dingtang ong·a obostarangni gimin ra·e jawilwatko ong·katatenba bang·a nigiparangni mikronko miknapatna man·anichi ia chu·sokaniko man·piltaienba an·tangkosan niksengataigija, A·chik a·song gimiknan namen rasong chaaniko ra·baaha.

Ia ‘Rimdogittanga’ jawilwato, Dominic Sangma, a·jatango ba biaptango dingtang dingtang obostarang ong·anichi walo-walo mikron nikbregijagipa saksa bilsi 10-ong·gipa me·a bi·sani walanti chagronggipa obostarangni gimin aro iandakgipa obostako uni janggi tanganio ua an·tangba cha·tote nikbagimin ong·anio pangchake kan·dikgipa golpo baksa jawilwatko tarienba a·gilsak gimikoni jawilwat tarigipa gipinrang baksa Australia a·songo susapaaniko dakangaha.

Ia Asian Pacific Screen Awards-o seokako man·e niksenganichi, A·chik a·songoni jawilwat tarina changbegipa Dominic Megam Sangma-ko a·gilsak gimikni cinema-o nambata gadangona sokatena gita dakchakaha.