Ampati, January 31: Re·baenggipa eleksino South West Garo Hills a·jao NPP doloni susanasienggipa Pa Subir Marak, Pa Sanjay A Sangma, Ian Botham K Sangma aro Steve Marak-maangna chakpaaniko on·na gita National People’s Youth Front, Mongolbar salo, Meghalaya-ni skotong minister gitcham Dr Mukul Sangma-ni a·jao motorcycle sale re·jomaniko ong·atangaha jeon a·dokni skotong minister Pa Conrad K Sangma, an·tangba bakko ra·anga baksana sak 1500 mang chadamberang rally-o bakko ra·angtokaha. Tom·ao bakko ra·e jinmana aganprakangengon, chingni NPP dol, a·doko chadamberangna dingtang dingtang namgnirangko ra·bana gita on·kange kamko ka·ataha aro prime programme-rangchi Meghalaya-o bading-chiwale janggi tangani cholrangko on·aha ine NPP dolni padot aro a·dokni skotong minister Pa Conrad K Sangma, manderangna aganprakangaha.
Ianpakni eleksinoba manderangni seoke watatako man·kuode, re·baenggipa bilsi 5-ni gisepo chinga lak 5 manderangna kam ka·e cha·ani cholrangko ong·katatgen ine aganangenba, kal·susaani, doka-damani aro minggipin a·barango changgipa-sapgiparang a·doko bang·en gnang, uandakgipa manderangna pangchakna cholrangko on·na gita chinga dingtang dingtang kal·susaaniko a·doko ong·atangkugen ine Pa Sangma parakataha.
Batanggimin 2018 bilsini eleksinode South-West a·jao chingoni MLA saksaba dongja aro bang·bata MLA-rangan warachakgipa dolchipaksa ong·ani gimin sorkarioniko dakchakanirangko am·ja jeni a·selsa South West a·jao bang·a namroro-silroroani project-rangko chinga ra·bana gita man·jaha ine talatangengon, MLA-rang, sorkari baksa bakrime kamko ka·na nangchongmota aro bil-sasonko jako ra·gipa doloniko MLA-na seokosa nambata ineba Pa Sangma aganangkuaha.
TMC dolko bakgni dakaha ine aganangskaengon, TMC dolo ka·dongani dongjani a·selan dolna chakpagiparangoni bang·aan ong·katokengaha aro NPP dolo napetokaha ine janapatenba, re·baenggipa eleksino NPP dolan bang·batachi chechongmotgen ineba skotong minister an·tangni ka·dongsoenganiko parakangjolaha.
Salni bako NPP dolna chakpaenggipa sak hajal manderangni bakko ra·angani somoio, da·ororo manderangni watrongenggipa NPP dolni gitko Arunachal Pradesh-oni sokbagipa Bage Kamsai, manderangna ring·e mesokangjolaha.
