Tura, Feb 13: Sonibar salo, Meghalaya a·dokni Chief Minister Conrad K Sangma, West Garo Hills a·jani Tikrikilla block-ni ning·o donggipa Lower Rengsipara songo, Rengsipara Integrated Village Cooperative Society-ni solar ba salni bilchi chalaigipa Cold Storage unit-ko kulie on·angaha.
Ia project-ko West Garo Hills MBMA-ni MeghaLAMP-ni ning·o ra·doataha aro ian song damsnina namgnirangko on·enga.
Ia project-ko a·bachengate on·angani somoio a·dokni Chief Minister, jinmana aganprakangengon, ian game ge·e cha·enggipa manderangna pilak karini somoirangon, an·tangtangni game ge·e man·gipa bosturangko ru·uta somoirangna ripinge donna dakchakani ong·gen ine parakangaha.
Game ge·e cha·enggipa manderangni namgnina mikkangchi a·dokni dingtang dingtang biaprangoba ia apsan dakgipa cold storage unit-rangko kulie on·anggen ineba ia tom·anio Chief Minister parakataha.
