Nongpoh, April 2: Meghalaya a·doko reservation policy-ko gital dake taritaipilchina Nongkrem-ni Voice of the People’s Party (VPP) MLA-ni dabianio Ri Bhoi a·jani Confederation of Ri Bhoi People (CoRP) dolba chakpaaniko parakataha.
Adita salrangna skang Assembly-ni budget session-ko ong·atanio, reservation policy-ni roster system-ni bidingo chanchirimna on·jahani gimin VPP-ni MLA, jingjengatanirangko dakna ka·mikkenatahachim ine nikna man·a.
Meghalaya a·doko reservation policy-ko rakkina roster system ra·gataniko jegalatengon, mande jelbra jelsuanio Khasi-Jaintia-rangna bate Garorang komibatani gimin skang tarigimin reservation policy-ko gital dake nipilenba taripiltaina nangchengenga ine CoRP-ni working president Pateng Myrsing parakataha.
A·doko songdongenggipa pilak jatrangnan apsan ong·e cholrangko on·na man·na gita reservation policy-ko tarichengani ja·mansa roster system-ko ra·gatna nanga ineba Myrsing dabiangaha.
Nongkrem MLA-ko jegaltokengani gimin Garo Hills-ni NGO-rangko matnangatskaengon, a·doko songdongenggipa pilak jatrangnan apsan cholrangko on·na nanga ine CoRP-ni working president parakataha.