Shillong, June 5: Reservation policy aro roster system-ni bidingo Voice of the People’s Party (VPP), politics kal•na jotton ka•asan ong•aigija a•doko songdongenggipa dingtang dingtang jatrangni gisepo ding•chaogrikaniko ra•bana jotton ka•aha ine Sombar salo, Meghalaya a•dokni Cabinet Minister aro West Shillong-ni UDP MLA Paul Lyngdoh matnangataha.

Lyngdoh-ni parakatani gitade, bilsi 20-na skang uni Khasi Students Union (KSU)-ni president ong•engmiting somoirangon ua reservation policy-ni bidingo ku•rangko on•ahachim indiba da•o VPP-ni president Ardent Miller Basaiawmoit, iako politics-ona ra•angna aro jatgnini gisepo ding•chaogrikanikosa ra•bana jotton ka•skaengachim.
2002 bilsio uni KSU-ni president ong•e reservation policy-ni gimin aganprakani video-ko da•o internet gita watenggipani bidingo Lyngdoh, ia kattarangko aganaha.

Ua somoio Basaiawmoit an•tangba NGO-ko dilgipa saksa ong•achim indiba ua somoiode ua reservation policy-ni bidingo ku•rang on•anina maming bakrimaniko on•skajaha ineba Lyngdoh matnangataha.

Re•anggipa antio, VPP-ni reservation policy-ko gital dake nipiltaichina dabie jingjengatengmiting somoio ‘Bah Paul’ bachi gimachipaha ine manderangni sing•anirangna aganchakaniko on•angengon, manderang uko MLA-nasa seokaha ong•ode ua saksa seokako man•gipa MLA aro cabinet minister-ni kamkosa ka•na nanga ine UDP MLA parakataha.