Nongpoh, May 17: Ri Bhoi a·jao para salgipa garirangko sorkarini dingtang dingtang kamrangna jakkalanio tangka paisarangko gamchipjaengani gimin mikkangchi Deputy Commissioner-ni office-na ba sorkarini kamrangna dakchakanirangko on·taijana gita All Ri Bhoi Passengers Vehicle (ARPV)-ni Joint Action Committee (JAC) ka·mikkenataniko on·angaha.
Joint Action Committee-ni chairman Bines Makri aro secretary Vincent Sohkhwai-ni parakatani gitade, dingtang dingtang kamrangna jakkalanio tangka paisarangko gamchipkujaengani gimin May-ni 16 tariko uamang tom·e chanchirimangenba, mikkangchide sorkarini kamrangko ka·jana tik ka·angaha aro apsan salon uamang Ri Bhoi a·jani Deputy Commissioner Arpit Upadhyaya-koba gronge, iani bidingo agangrikangaha.
Gari nokgiparangna aro driver-rangna COVID-19 sajinmani somoirangonin tangka paisarangko gamkujaenga ine talataniko on·angengon, February jao ong·atanggipa Meghalaya Legislative Assembly election-ni somoirangoba uamangni garirangko jakkale da·o uamangni man·na nanggnirang bariangaha ine JAC-ni dilgiparang parakataha.
JAC-ni parakatani gitade, election duty-ni tangka paisarangkode da·o sal 15 ba sal 20-ni gisepon uamangna gamgnok ine DC ku·rachakaniko on·ataha.
