Shillong, Apr 7: Ri Bhoi a•jani Umsaw Nongkharai-o donggipa Health & Wellness Centre-o manderangna nambate sanna bananirangko on•na man•na gita aro mongsongbate tikarangko name rakkina man•na gita Bristibar salo, Meghalaya a•dokni Chief Minister Conrad K Sangma, ia centre-o Solar Power Energy-ko kulie on•angaha.
Ia health centre-o Solar Power Energy-ko kulie on•angani somoio a•dokni Chief Minister, jinmana aganprakangengon, manderangna sanna bananirangko nambate on•na aro mongsongbate tikarangko rakkie donna man•na gita ia health centre-o Solar Power Energy-ko songe on•ahani gimin SELCO Foundation-ko mittelpilangaha.
A•doko an•seng baljokaniko on•na gita rakbee kamrangko ka•engani gimin ua National Health Mission-o kam ka•enggiparangko aro gipin health worker-rangkoba mittelpilangaha.
Ia health centre-o Solar Power Energy-ko kulie on•angani somoio dongpae bakko ra•anggipa gipin manderangara, Umsning-ni MLA Jason S Mawlong, Ri Bhoi a•jani Deputy Commissioner Arpit Upadhyaya aro gipinrang ong•a.
