Shillong, Sep 27: Mongolbar salo, Hynniewtrep Integrated Territorial Organisation (HITO) Eastern Zone Ri Bhoi District-ni dilgiparang, Ri Bhoi a•jani Bhoirymbong C&RD Block-ni ning•o donggipa Umktieh-oni Nonglum-ona tarienggipa ramako nina re•angenba, ia ramako Public Works Department (PWD)-ni dongimin niam gita tarija ine matnangataha.
HITO-ni president Willstar Sun-ni parakatani gitade, ia ramako tarienggipa contractor, kamrangko name ka•rongjaenga ine changni chang badi ka•anirangko man•soahani gimin Umktieh-oni Nonglum-ona gital tarienggipa ramako nieon, ia ramako PWD-ni dongimin niamrang gita tarijaenga ine nikna man•aha.
Ia ramako niam gita aro somoi gita matchote tarina contractor-na ge•etaniko on•china PWD-ni official-rangko didiatengon, ia ramako niam gita aro somoi gita matchote tarijagenchimode contractor-ni kosako rakgipa ja•kurangko de•anggen ine HITO-ni dilgiparang mikrakataniko on•angaha.
