Nongpoh, Aug 29: Ri Bhoi College-oni Commerce aro Arts Stream-o chu·sokanggipa sak 325 chatro Chatrirangna Ri Bhoi-ko nirokenggipa dilgiparang mandera·ani kamrangko August 29 tariko dakataha.
Ia mande raani Program-o Nongpoh-ni Local MLA Mayral Born Syiem, Ri Bhoi College-ni Principal SSR Bamon aro College-o skie on·giparangba dongpaaha.
Bilsi 2020-o Education Subject-ko Major dake skanggipa gadango chu·sokanggipa Tra Daphira Khymdeit-na dingtangtegipa boksis-ko on·an baksa MLA tangkakoba on·aha.
Tom·anio Mayral Born Syiem aganengon, chu·sokgipa chatro chatrirangko mandera·ani program-ko ong·atanina kusi ong·ani kattarangko aganan baksa ian da·alo poraienggipa chatro chatrirangko didiani aro ra·beani ong·a ine aganaha.
Re·baenggipa salrangoba NEHU-ni porikarangko name dakchina ku·patian baksa rakbate jotton ka·e Ri Bhoi College-ko niksengatchinaba chatro chatrirango mol·mole aganangaha.
