Shillong, Sept 12: Meghalaya Energy Corporation Limited (MeECL) Umsning Division-ni power department-ko private firm-na pakwate on·na gita a·dok sorkarini chanchie ra·baenganina Power Franchisee-ni kosako namnikgijaniko mesoke jegalangna, Synjuk Ki Rangbah Shnong Ri Bhoi District-ni dakdilanichi Umsning a·jani song-nokni nokmarang aro niksenggipa dolgittam pressure group-rang gimik nangrime Joint Action Committee-ko songaha.
Ia gital songgipa JAC-ni gita a·dok sorkarini kosako jegalaniko dakna gita, Synjuk Ki Rangbah Shnong Ri Bhoi District-ni tanggitik tom·aniko ong·atanggipao jinma tik ka·angaha jeon Umsning a·jani joltangni Rangbah Shnong aro Khasi Students Union, Hynñiewtrep National Youth Front, Federation of Khasi Jaintia & Garo People’s aro gipin dolni dilgiparang bakko ra·angaha.
Tom·ao dongpagipa SKRS-ni padot BB Makdoh, secretary PB Sylliang, KSU-ni padot Ferdynald Kharkamni, HNYF-ni padot Marcus Marten aro gipinrang, Umsning Division-ni power department-ko private-na on·e galna chanchie ra·bagipani gimin ning·tue chanchirimangenba iandakgipa ja·ku de·aniko raken jegalangna gita uamang tik ka·angtokaha.
Iani gimin BB Makdoh aro Ferdynald Kharkamni-maangni koborna agananio, a·dok sorkarini, MeECL Umsning Division-ko private firm-na pakwatna am·engani gimin suk ong·gijaniko janape, ian ja·manchi joltangni manderangna bang·a neng·nikaniko ra·bachongmotgen ine uamang parakataha.
A·dokni gipin district-rangni bakrangona bate bijoliko jakkalenggiparang bijolini kajinarangko tik ong·e gamtokachi Ri-Bhoi district-an a·dokna kajinarangko bang·bate ong·katatengachim ine janapatenba, indide a·joltangni manderang baksa chanchirimgija ba maming u·iataniko on·chenggija a·dok sorkari maini gimin ia power department-ko private-na on·e galna am·enga ineba uamang sing·doangaha.
“A·dok sorkarini iandake chanchie ra·baaniko chinga raken jegala aro sorkarini talataniko chinga nangnika, aro department-ko private-na on·ani palde je donga power station-rangko a·doko namdapatna gitasa sorkari ja·kurangko de·chakatna nangachim”, ineba dilgiparang suk ong·gijaniko parakangtokaha.
Unbaksana, re·baenggipa salrango Ri Bhoi district-ni bijoli bikotgipa stage 1, 2 aro 3-ona re·ange dilgiparang nangrime nirokeaniko dakna tik ka·anga baksana, JAC iani bidingo Power Minister aro MeECL-ni Chief Engineer-na memorandum-ko on·angnaba tik ka·aha ine dilgiparang u·iatjolaha.
