Nongpoh, April 26: Pekatgipa sam ba drug-rangko niam gri badingsrukengani gimin ning·joljol koborrangko man·soe ja·kurangko de·atenba Ri-Bhoi a·jani police-rang, pekatgipa bosturangko Tripura a·dokoniko Bihar-china bolsa tourist bus gario ra·angengmiting somoio me·chik saksako man·chape sakgni manderangko Butbar salo Byrnihat jolo rim·aha.
Koborna u·iatani gitade, Ri-Bhoi a·jani ANTF dol pring 9 bajimango rama tong·sao Naka checking-ko dakmitingo bus bolsa AS 01LC 1412 -ko dongdipate sandiataniko dakani ja·man ua sakgni manderangko rim·an baksa, uamang sakgnini ra·bagipa bosturang ine chanchichipenggipa champengatgimin pekatgipa sam katom bongarangkoba sekaha.
ANTF-ni jakchi rim·ako man·giparanga, Bihar, Jhauganj-ni Mogalpura Barkhat Khan Ka Akhara-oni saksa Rohit Kumar aro apsan a·dokoni Gram Timapur Lagar, Panchayat Lagar-oni sakgipin Premlata Devi ine ma·sina gita man·aha aro sakgnikon police-ni jako on·e uamango sing·sandie ra·dapanirangko dakatenga ine koboro parakataha.
Indake ong·engon, sekgimin bosturangko porikka ka·an baksa toe nianirangko dakon, ua bostuko Marijuana ine ma·sina man·aha aro jrima gimikara kg 16.2-mang ong·achim.
Iakoba poraie nina man·gen: Rama tarigipa company-rang Kanai-Mahadeo chibimarangko nisigalenga
